अजित पवारांच्या बारामतीत चाललंय तरी काय?, दिवसाढवळ्या पिस्तुलाचा धाक दाखवून..

शहरातील पाटस रस्त्यावर असणाऱ्या कृष्ण पेट्रोल पंपाचे व्यवस्थापक मयूर शिंदे (वय 32 वर्ष) हे पेट्रोल पंपावरील रक्कम बँकेत भरण्यासाठी जात असताना त्यांना पिस्तुलाचा धाक दाखवत लुटण्याचा प्रकार घडला. या घटनेत ते गंभीर जखमी झाले आहेत. मात्र त्यांनी केलेल्या निकराच्या प्रतिकारामुळे दोघा चोरट्यांनी रक्कम न घेताच तेथून पळ काढला.

नेमकी घटना काय घडली?

व्यवस्थापक मयूर शिंदे हे नेहमीप्रमाणे पेट्रोल पंपावरील रक्कम घेऊन दुचाकीवरून शहराच्या दिशेने निघाले होते. यावेळी स्प्लेंडर दुचाकीवरून आलेल्या दोघांनी त्यांना पिस्तुलाचा धाक दाखविला त्यांच्याकडे रक्कम असलेली बॅग हिसका मारून पळून नेण्याचा प्रयत्न केला. परंतु शिंदे यांनी पैसे असलेली बॅग पोटाखाली दाबून ठेवली. बॅग हाती मिळत नसल्याचे लक्षात येताच दरोडेखोरांनी मयूर शिंदेंना काही अंतरापर्यंत फरपटतही नेलं.

हे ही वाचा >> Ratnagiri: नीलिमा चव्हाणचा नेमका मृत्यू कसा झाला?, पोलिसांनी दिली मोठी माहिती

तरीही शिंदे यांनी आपली चिकाटी सोडली नाही. चोरट्यांना बॅग मिळू नये यासाठी त्यांनी जीवाची शिकस्त केली. या घटनेत चोरट्यांनी त्यांना जबर मारहाण केली. ज्यामुळे ते गंभीर जखमी झाले आहेत. त्यांना उपचारासाठी बारामतीतील शासकीय रुग्णालयात दाखल करण्यात आले आहे.

हे ही वाचा >> Sana Khan: नागपूरमधील भाजप महिला नेता बेपत्ता, हत्या झाल्याचा संशय

बारामतीतील ज्येष्ठ नगरसेवक किरण गुजर यांच्या मालकीचा हा पेट्रोल पंप आहे. हे काम माहितीतील व्यक्तीने केले असावे. बारामतीत भर दिवसा अशा घटना घडणे चिंतेची बाब आहे. सुदैवाने रक्कम चोरीला गेली नाही, मात्र आमचे व्यवस्थापक मयूर शिंदे हे जबर जखमी झाले आहेत. सध्या त्यांच्या उपचाराच्या कामात आम्ही आहोत. अशी प्रतिक्रिया किरण गुजर यांनी दिली आहे.