प्रेयसीने विष प्यायलं...,प्रियकराने गळफास घेऊन आयुष्य संपवलं! नेमकं काय घडलं?

मिळालेल्या माहितीनुसार, भमोरा पोलीस ठाण्याच्या हद्दीतील एका गावात मंगळवारी सकाळी गावकऱ्यांना शेतातील एका झाडाला तरुणाचा मृतदेह लटकलेल्या अवस्थेत आढळून आला. ही बातमी वाऱ्यासारखी गावात पसरली आणि घटनास्थळी बघ्यांची मोठी गर्दी जमली. मृतदेहाची ओळख पटवली असता, तो स्थानिक रहिवासी 22 वर्षीय कृष्णपाल असल्याचे समोर आले. घटनेची माहिती मिळताच कृष्णपालच्या कुटुंबीयांनी एकच आक्रोश केला. पोलिसांनी तातडीने घटनास्थळी धाव घेऊन पंचनामा केला आणि मृतदेह शवविच्छेदनासाठी जिल्हा रुग्णालयात पाठवून दिला. सुरुवातीला ही आत्महत्या वाटत असली तरी, यामागील मूळ कारण शोधण्याचा प्रयत्न केला असता एक धक्कादायक वास्तव समोर आले.

या प्रकरणाचा तपास केला असता असे समजले की, कृष्णपालचे शेजारील गावातील एका तरुणीवर प्रेम होते. दोघांनाही लग्न करून संसार थाटायचा होता, मात्र त्यांच्या या नात्याला कुटुंबीयांकडून कडाडून विरोध होत होता. दोन दिवसांपूर्वीच कृष्णपालच्या प्रेयसीने लग्नाला होत असलेल्या विरोधामुळे विष प्राशन करून आत्महत्येचा प्रयत्न केला होता. तिला गंभीर अवस्थेत इज्जत नगर पोलीस ठाणे परिसरातील एका खाजगी रुग्णालयात दाखल करण्यात आले असून, तिची प्रकृती अद्याप चिंताजनक असल्याचे सांगण्यात येत आहे. आपल्या प्रेयसीने उचललेले हे टोकाचे पाऊल आणि विरहाच्या भीतीने कृष्णपाल पूर्णपणे खचून गेला होता, ज्यातूनच त्याने हे टोकाचे पाऊल उचलल्याचे प्राथमिक तपासात दिसत आहे.

भमोरा पोलीस ठाण्याचे प्रभारी सनी चौधरी यांनी दिलेल्या माहितीनुसार, या संपूर्ण प्रकरणात अद्याप कोणत्याही बाजूने अधिकृत तक्रार दाखल करण्यात आलेली नाही. पोलिसांनी मृतदेहाचे शवविच्छेदन करून तो नातेवाईकांच्या स्वाधीन केला आहे. प्रेमप्रकरणातून निर्माण झालेल्या तणावातून या दोघांनी आपले जीवन संपवण्याचा निर्णय घेतल्याचे उघड झाले आहे. सध्या पोलीस या प्रकरणाचा सर्व बाजूंनी तपास करत असून, रुग्णालयात उपचार घेत असलेल्या तरुणीच्या प्रकृतीकडे लक्ष ठेवून आहेत. एका तरुणाचा अशा प्रकारे अंत झाल्याने संपूर्ण गावात शोककळा पसरली असून तरुण पिढीतील अशा टोकाच्या निर्णयांवर चिंता व्यक्त केली जात आहे.