मुलीची तब्येत बिघडल्याने घरी मांत्रिकाला बोलवलं, नंतर बंद खोलीत पीडितेचे कपडे काढले अन् अर्धा तास...

मुलीची प्रकृती बिघडल्याने घरी मांत्रिकाला बोलवलं... 

झाशीच्या बरुआसागर पोलीस स्टेशनमध्ये राहणाऱ्या एका व्यक्तीने पोलिसांकडे तक्रार करताना सांगितलं की, त्यांना चार मुली असून त्यांची 12 वर्षांचा मुलगी 8 वीत शिकते. काही दिवसांपासून तिच्या गळ्यात खूप वेदना होत होत्या आणि त्यामुळे तिला व्यवस्थित जेवता देखील येत नव्हतं. तिच्यावर उपचार सुद्धा करण्यात आले पण, तिच्या प्रकृतीत काहीच फरक पडला नाही. दरम्यान, मध्य प्रदेशातील निवाडी जिल्ह्यात राहणारा हरभजन नावाचा मांत्रिक जादू-टोणा करून प्रकृती ठिक करत असल्याची माहिती त्यांना मिळाली. 

त्यानंतर, पीडितेच्या कुटुंबियांनी 18 नोव्हेंबर रोजी हरभजनला घरी बोलवलं. मुलीला पाहिल्यानंतर मांत्रिक म्हणाला की तिच्यावर भूत-प्रेताची सावली असून मुलीला बरं करण्यासाठी एकट्यातच सगळे विधी केले जातील. त्याने मुलीच्या आई-वडिलांना सांगितलं की "तिला घरातील एका खोलीत नेलं जाईल आणि कोणीही आत येऊन नका. विधी सुरू असताना मुलगी जरी रडली तरी सुद्धा कोणीच आत येऊ नका." पीडितेच्या आई-वडिलांनी मांत्रिकाच्या बोलण्यावर विश्वास ठेवला. 

हे ही वाचा: मुंबई: राहत्या फ्लॅटवरून जोडप्यात वाद! संतापलेल्या पतीने बायकोच्या डोक्यात दगड घातला अन्...

बंद खोलीतील पीडित मुलीवर अत्याचार

त्यानंतर, मांत्रिकाने मुलीला एका खोलीत नेलं, तिचे कपडे काढले आणि तिच्या अंगावर लिंबू लावून तिच्यासोबत अश्लील कृत्ये करण्यास सुरूवात केली. त्यावेळी, मुलगी खूप रडत होती. पण मांत्रिकाने तिच्या आई-वडिलांना आत येण्यापासून रोखलं. अर्ध्या तासानंतर, तो बाहेर आला आणि विधी पूर्ण झाल्याचं त्याने सांगितलं. मात्र, पीडिता बाहेर पडल्यानंतर आईला बिलगून खूप रडत होती. आईने तिची विचारपूस केली असता मुलीने रडत रडत मांत्रिकाच्या अश्लील कृत्याबद्दल सांगितलं.