कोमल, नम्रता अन् लग्नाचा सेटअप, नवरदेव तयार पण घडला विचित्र प्रकार!

Nagpur Crime News : गुजरातमधील भावनगर येथे राहणाऱ्या 31 वर्षीय तरुणाला लग्नाच्या नावाखाली फसवणूक झाल्याचा धक्कादायक प्रकार समोर आला आहे. अनेक दिवस प्रयत्न करूनही लग्न जमत नसल्याने त्याने नागपूरमध्ये राहणाऱ्या एका ओखळीच्या व्यक्तीकडे मुलगी शोधण्याबाबत मदत मागितली होती. काही दिवसांनी त्याला मुलगी मिळाल्याचा फोन आला आणि त्याला नागपूरला बोलावण्यात आले. त्यानुसार तो तातडीने नागपूरला पोहोचला. तेथे त्याची भेट राणी उर्फ कोमल पांडे हिच्याशी करून देण्यात आली. तिने त्याला एका तरुणीचा फोटो दाखवत तिचे नाव नम्रता मालवीय असल्याचे सांगितले. फोटो पसंत पडल्यानंतर तरुणाला कोराडी परिसरातील एका घरात नेण्यात आले. तेथे नम्रता उपस्थित होती, तसेच काही जण स्वतःला तिचे नातेवाईक असल्याचे सांगत होते. दोन्ही बाजूंमध्ये चर्चा झाली आणि लग्नाचा प्रस्ताव जवळपास निश्चित झाल्याचे तरुणाला वाटले.