महाराष्ट्रातील सोनमचा ‘दृश्यम’ पेक्षा खतरनाक प्लॅन; 2 महिन्यानंतर मिळाला पतीचा मृतदेह...

Nashik Crime News: नाशिक जिल्ह्यातील सुरगाणा तालुक्यातील मालगोंडा या छोट्याशा गावात एक हृदयद्रावक घटना घडल्याचं उघडकीस आलं आहे. इथे एका पत्नीने तिच्याच पतीची हत्या करून त्याचा मृतदेह घराजवळील नाल्यात पुरला. या भयानक प्रकाराने संपूर्ण परिसर हादरूला आहे. यशवंत ठाकरे अशी मृत व्यक्तीची ओळख झाली असून तो 14 एप्रिलपासून बेपत्ता असल्याची माहिती मिळाली.

दोन महिन्यांनंतर पोलिसांनी या प्रकरणाचं गूढ उघडकीस आणलं आणि या घटनेनं सर्वांनाच मोठा धक्का बसला.  दोन महिने उलटून गेल्यावर सुद्धा यशवंत घरी परतले नव्हते आणि त्यावेळी याबद्दल त्यांच्या आई-वडिलांना त्यांची काळजी वाटत होती. या काळजीपोटी त्यांनी त्यांची सून प्रभाला विचारलं. त्यावेळी यशवंत कामानिमित्त गुजरातला गेले असल्याचं प्रभाने सांगितलं. त्यानंतर कुटुंबातील सदस्य यशवंतचा शोध घेण्यासाठी गुजरातला गेले आणि तिथल्या चौकशीनंतर यशवंत तिथे कधीच गेला नसल्याचं नातेवाईकांना सांगितलं. यामुळे संशय आणखी वाढला. कुटुंबिय सतत प्रभाला याबद्दल विचारत होते मात्र त्यावेळी प्रभा उत्तर देण्यास टाळाटाळ करायची किंवा अस्पष्ट उत्तर द्यायची.