शशांक शर्मा, राहुल, आकाश आणि त्यांच्या इतर साथीदारांनी पोलीस अधिकारी असल्याचे भासवून नीरजला धमकावले, दोन लाखांची खंडणी मागितली आणि त्याच्या खात्यातून 10 हजार रुपये ट्रान्सफर करून घेतले. या गंभीर प्रकरणानंतर वरिष्ठ पोलीस अधीक्षकांच्या सूचनेनुसार पथक तयार करून पोलिसांनी राहुल आणि आकाशला रंगेहात अटक केली. उत्तर प्रदेशातील मेरठमधील ही घटना आहे.

'असा' साधायचे डाव

पोलीस तपासात आणि चौकशीदरम्यान आरोपींनी स्पष्ट केले की, त्यांची पाच जणांची टोळी Instagram च्या माध्यमातून लोकांना जाळ्यात ओढायची. सोशल मीडियावर मुलींचे बनावट अकाऊंट तयार करून तरुणांशी संवाद साधला जायचा आणि त्यांना संवादात गुंतवून एका ऑफिसमध्ये भेटायला बोलावले जायचे. पीडित तरुण तिथे पोहोचताच त्याला धमकावण्याचा खेळ सुरू व्हायचा. आरोपी स्वतःला पोलीस अधिकारी सांगून, बनावट FIR दाखवून आणि कायदेशीर कारवाईची भीती घालून तरुणांकडून मोठ्या रकमेची मागणी करायचे. नीरज पाल यालाही याच पद्धतीने जाळ्यात ओढण्यात आले होते.

हे ही वाचा : उद्धव ठाकरे असं बोलले की, संजय राऊत जोरात हसले; नेमकं काय म्हणाले?

बनवाट पोलीस चौकी?

एसपी सिटी विनायक गोपाळ भोसले यांनी दिलेल्या माहितीनुसार, नीरज जेव्हा बोलावलेल्या ठिकाणी पोहोचला, तेव्हा ज्या मुलीशी तो बोलत होता ती तिथे नव्हती. त्यानंतर व्हिडिओच्या नावाखाली त्याला ब्लॅकमेल करून दोन लाखांची खंडणी मागण्यात आली. दरम्यान, ही टोळी येथे एक 'बनावट पोलीस चौकी' चालवत असल्याचा दावा सोशल मीडियावर केला जात होता; मात्र मेरठ पोलिसांनी हा दावा फेटाळून लावला आहे. तिथे कोणतीही बनावट पोलीस चौकी नसून केवळ एक ऑफिस होते, असे पोलिसांनी स्पष्ट केले. हा पूर्णपणे हनीट्रॅपचा प्रकार असून यातील दोन प्रमुख आरोपींना बेड्या ठोकण्यात आल्या आहेत.