Rashmi Barve Ramtek : बर्वेंचं जात प्रमाणपत्र रद्द, काँग्रेसचा दुसरा उमेदवार कोण?

महाविकास आघाडीमध्ये रामटेक हा लोकसभा मतदारसंघ काँग्रेसला देण्यात आला. अनुसूचित जाती या प्रवर्गासाठी राखीव असलेल्या या मतदारसंघातून काँग्रेसने रश्मी बर्वे यांना उमेदवारी दिली. मात्र, जात प्रमाणपत्रामुळे त्यांची उमेदवारी धोक्यात आली आहे.

हेही वाचा >> "नवनीत राणा 'मौत का कुआं'मध्ये गेल्यात", शिंदेंचा नेता स्पष्टच बोलला

हेही वाचा >> बारामतीसाठी अजित पवारांचा विजय शिवतारेंसोबत 'तह'

गुरुवारी (28 मार्च) विभागीय जात प्रमाणपत्र पडताळणी समितीने रश्मी बर्वे यांचे जात वैधता प्रमाणपत्र रद्द केले. हा काँग्रेससाठी मोठा झटका मानला जात आहे. रश्मी बर्वे यांनी या प्रकरणात आधीच न्यायालयामध्ये धाव घेतलेली आहे. त्यामुळे आता कोर्टाच्या निर्णयावर बर्वे यांचं भवितव्य अवलंबून आहे. 

काँग्रेसने आधीच घेतली खबरदारी

रश्मी बर्वे यांना रामटेकमधून उमेदवारी दिली जाणार, अशी चर्चा सुरू झाल्यानंतरच त्यांच्या जात वैधता प्रमाणपत्राचा मुद्दा पुढे आला होता. त्यांच्या जात प्रमाणपत्राविरोधात तक्रार करण्यात आली. जात पडताळणी समितीने उमेदवारी अर्ज भरण्याच्या अंतिम तारखेनंतर निकाल दिल्यास काँग्रेसला दुसऱ्या उमेदवाराला पाठिंबा द्यावा लागला असता. त्यामुळे काँग्रेसने ही अडचण ओळखून आधीच पर्यायी उमेदवारही दिला होता.