Sharad Pawar : "मंत्री म्हणतोय, पंतप्रधान मोदींना देशाची घटना बदलायचीय"

बारामतीत झालेल्या कार्यक्रमात बोलताना शरद पवार म्हणाले, "आज सबंध देश निवडणुकीच्या उंबरठ्यावर उभा आहे. आपण तसं भाग्यवान आहोत, डाॅ. बाबासाहेब आंबेडकरांनी घटना लिहली, त्या घटनेनं या देशामध्ये स्थैर्य आणलं, आणि व्यवसाय करण्याच्या संबंधीचे अडथळे दूर केले. जिथे घटना भक्कम नाही, त्या देशामध्ये काही ना काही वेगळं घडलं."

पवारांनी दिलं पाकिस्तान, श्रीलंकेचं उदाहरण

"बांग्लादेश हा शेजारचा देश आहे. तिथे मुजीबूर रहेमान नावाचे देशाचे प्रधानमंत्री होते. एक दिवशी त्यांची हत्या केली गेली आणि लष्कराच्या हातात सत्ता गेली. पाकिस्तान हा शेजारचा देश, तिथे लोकशाही होती, आणि अयूब खान नावाचा एक लष्कराचा अधिकारी आला, त्याने लोकशाही उध्वस्त केली. देशामध्ये हुकूमशाही सैन्याच्या हाताखाली आली. असंच श्रीलंकेमध्ये सुध्दा झालं. आजूबाजूला जिथे लोकशाही दुर्मीळ झाली, त्याठिकाणी हुकूमशाही अस्तित्वात आली, हे चित्र आपण पाहिलं", असेही पवार म्हणाले. 

हेही वाचा >> ''झ@$ला बोलतो, इकडे...'', अजित पवारांवर टीका करताना शिवतारेंची शिवराळ भाषा

"आज हिंदुस्थानामध्ये लोकशाहीचं संरक्षण करणं याची अत्यंत गरज आहे. संविधानाचं रक्षण करण्याची गरज आहे. मी गेल्या आठवड्यामध्ये कर्नाटकातल्या एका भाजप नेत्याचा जो पार्लमेंटमध्ये सभासद आहे. त्याचं भाषण ऐकत होतो. त्यांनी भाषणात काय सांगितलं की, आम्ही तुम्हाला मत मागतोय आणि या देशाची घटना नरेंद्र मोदींना बदलायची आहे. घटना बदलण्यासाठी तुम्ही आम्हाला विजयी करा. आणि अशी भूमिका मांडली, जो केंद्र सरकारमध्ये सत्ताधारी पक्षाचा मंत्री होता, आणि मोदींना यासाठी मतदान करा, हे जे सांगत आहेत हे अत्यंत धोक्याची परिस्थिती आहे. म्हणून या निवडणुकीकडे नेहमीपेक्षा अधिक लक्ष देण्याची गरज आहे", असे आवाहन पवारांनी यावेळी केले.

"अनेक धोरणं आखली गेली. या धोरणांमध्ये सातत्य नाही. बारामतीमध्ये शेती हा महत्त्वाचा उद्योग आहे. शेतीमध्ये ऊसाचा धंदा हा मोठा धंदा आहे. आज काय चित्र दिसतंय, जगातील दोन नंबरचं साखर उत्पादन हे भारतामध्ये होतं आणि भारतात दोन नंबरचं उत्पादन हे महाराष्ट्रात होतं. काय धोरणं आखली? ऊसाची किंमत वाढली आनंद आहे. पण साखरेचं काय? साखर ही दुनियामध्ये पाठवली पाहिजे. निर्यातीचं धोरणं आखलं आणि एका दिवशी सांगून टाकलं की,  उद्यापासून निर्यातीवर बंदी. आज निर्यातीवर बंदी आहे. उत्पादन वाढवायचं, शेतकऱ्याला दोन पैसे देण्याची खात्री द्यायची. आणि जो माल तयार करतो त्याच्यावर विक्रीवर बंधनं आणायची. आज हे काम त्या ठिकाणी केलेलं आहे", असेही पवार म्हणाले.