‘परिस्थिती जेवढी बिकट, मराठा तेवढाच तिखट!’ सरसेनापती हंबीररावचा जबरदस्त टिझर पाहिलात का?

‘हंसाजी मोहिते, स्वराज्य हे डोईवर आलेल्या धगधगत्या सूर्यासारखं. ते कायम धगधगतच राहिलं पाहिजे, परकिय आक्रमणांच्या काळरात्री येतच राहतील. अशा काळरात्रींना मधोमध चिरायलाच आपण केशरी रंग बनून जन्माला यायचं.’ ‘स्वराज्यात दोन-दोन वर्ष पाऊस नाही पडला तरीही थंडीच्या दवावर ज्वारी बाजरी काढणारी जात आहे आपली’ ‘परिस्थिती जेवढी बिकट मराठा तेवढाच तिखट’ हे तीन डायलॉग या टीझरमध्ये आहेत. सिनेमातले संवाद हे प्रविण तरडेंचं वैशिष्ट्य आहे. मुळशी पॅटर्न हा सिनेमा अजूनही संवादांमुळेच लोकांच्या लक्षात आहे. तसाच हा हंबीरराव मोहिते सिनेमाही त्यातल्या संवादांमुळे लक्षात राहिल यात शंका नाही.

प्रविण तरडे यांनी सरसेनापती हंबीरराव या सिनेमाची कथा, पटकथा, संवाद, दिग्दर्शन आणि अभिनय अशी जबाबदारी स्वीकारली आहे. ती त्याने लिलया पेलली आहे हेच हा सिनेमा सांगून जातो आहे. मुळशी पॅटर्ननंतर प्रविणचा हा सिनेमा प्रेक्षकांच्या भेटीला येतो आहे त्यामुळे साहजिकच या सिनेमाकडून अपेक्षा वाढल्या आहेत.

हंसाजी मोहिते यांच्या अतुल्य पराक्रमामुळे छत्रपती शिवाजी महाराजांनी त्यांना हंबीरराव ही पदवी दिली होती. हंबीरराव मोहितेंना पराक्रमाचा वारसा लाभला तो आपल्या कर्तबगार घराण्यातून. आपल्या पूर्वजांप्रमाणेच हंबीररावही शूर आणि पराक्रमी होते. कोणत्याही संकटाला निधड्या छातीने सामोरं जाणाऱ्या या वीराची कथा आता रूपेरी पडद्यावर प्रविण तरडेंच्या सिनेमाद्वारे येते आहे. या सिनेमाचा टिझर हा नेटकऱ्यांमध्ये आणि सोशल मीडियावर चर्चेचा विषय ठरला आहे.

हंबीरराव मोहिते यांच्या पराक्रमाची साक्ष म्हणजे त्यांची तलवार. ही तलवार प्रतापगडावरच्या भवानी मातेच्या मंदिरात भवानी मातेसमोर ठेवण्यात आली आहे. अफझल खान स्वराज्यावर चाल करून आला होता तेव्हा छत्रपती शिवाजी महाराजांनी युक्तीने त्याला मात दिली. त्यानंतर जी लढाई झाली त्यात हंबीरराव मोहिते यांचा मोठा वाटा होता. त्या पराक्रमचं प्रतीक म्हणून ही तलवार या ठिकाणी ठेवण्यात आली आहे. हंबीरराव मोहिते यांच्या तलवारीवर चांदणीच्या आकाराचे सहा शिक्के आहेत.

सहा तासांच्या लढाईत त्यांनी सहाशे शत्रूंना संपवलं असं म्हटलं जातं. त्या काळी मावळ्याने एका लढाईत शंभर शत्रूंना कंठस्नान घातले तर त्या मावळ्याच्या तलवारीवर शिक्का उमटवला जात असे. हंबीरराव मोहितेंच्या तलवारीवर सहा शिक्के आहेत. असा पराक्रम त्यांच्यानंतर कुणी गाजवला हे ऐकिवातही नाही.