Amol Kolhe यांना म्हटलं.. अहो लोकं जोड्याने मारतील...: अजित पवार

अमोल कोल्हेंना दोन वर्षातच राजीनामा द्यायचा होता. मी त्यांना तेव्हा समजवलं.. पण या सेलिब्रिटींना आम्हीच एखाद्याविरोधात काढतो.. पण या नट-नटींचा राजकारणाशी काय संबंध आहे? असं म्हणत अजित पवारांनी आज (3 मार्च) शिरूरमधील एका सभेतून अमोल कोल्हेंवर जोरदार हल्ला चढवला.

हे ही वाचा>> Upendra Rawat : भाजप खासदाराची निवडणुकीतून माघार, अश्लील व्हिडिओ ठरलं कारण

पाहा खासदार अमोल कोल्हेंबाबत अजित पवार नेमकं काय म्हणाले...

'मी आपल्याला स्पष्ट सांगतो की, या सगळ्या बाबतीत मागं मीच तुमच्याकडे डॉ. अमोल कोल्हेंना मतदान करा अशा प्रकारची विनंती करायला यायचो. मी त्यांना दुसऱ्या पक्षातून माझ्या घरी नेऊन पक्षात प्रवेश देऊन आणि तिकीटही देऊन मी आणि वळसे-पाटलांवर जुन्नरची जबाबदारी टाकलेली.. माझ्यावर भोसरी, शिरुर आणि हडपसर ही जबाबदारी घेतलेली.. ती जागा आपण निवडून आणली.' 

'मलाही वाटलं वक्तृत्व चांगलं आहे.. दिसायला राजबिंडा आहे.. चांगल्या पद्धतीने काम करतील. पण नंतर-नंतर दोन वर्षच झाले आणि ते म्हणायले लागले की, दादा मला राजीनामा द्यायचाय.. मी म्हटलं जनतेने पाच वर्ष निवडून दिलंय आणि दोनच वर्षात राजीनामा द्यायचाय? लोकं जोड्याने मारतील.. काय अडचण काय आहेत?'

'ते म्हणाले मला जमणार नाही सारखं मतदारसंघात यायला, मला माझी नाटकं, सीरियल असतात.. माझ्या व्यवसायावर परिणाम होतोय, म्हणून मला राजीनामा द्यायचाय खासदारकीचा.. मी म्हटलं तसं करू नका...'

'खरं तर राजकारण त्यांचा पिंडच नाही.. आम्ही राजकारणी काय करतो.. एखादा उमेदवार आम्हाला पराभूत करता येत नसेल तर सेलिब्रिटी काढायचे.. खोटं नाही बोलत.. तुम्ही देशात बघा.. काही ठिकाणी हेमामालिनी उभ्या राहतात, निवडून येतात. काही ठिकाणी सनी देओल, धर्मेंद उभा राहतो. गोविंदा उभा राहतो. नट-नटीचा काय यांचा राजकारणांशी संबंध आहे?' 

'एकदा अमिताभ बच्चन पण उभे राहिले होते. पण नंतर राजीनामा दिला आणि दिलं सोडून.. शेवटी त्या भागातील विकासाची कामं करायची आवड आहे का? हे महत्त्वाचं आहे..' 

'आता ते शिवजंयतीच्या दिवशी मला भेटले तिथे.. तेव्हा म्हटलं मी त्यांना... काय डॉक्टर तुम्ही तर म्हणत होता राजीनामा द्यायचा.. अन् आता पुन्हा दंड थोपटले... तर म्हणे नाही आता पुन्हा उभं राहावं वाटतंय..' 

'माझी एक विनंती आहे.. महायुतीच्या सरकारमधील एक घटक म्हणून मी तुमच्या पुढे काम करतोय. माझी एवढीच अपेक्षा आहे की, उद्याच्या लोकसभेच्या निवडणुकीच्या निमित्ताने आम्ही महायुतीचा उमेदवार देणार आहोत. तसं जागा वाटप आमचं झालेलं नाही. लवकरच होईल.. पण जागा वाटप झाल्यानंतर मी माणसातला माणूस.. लोकसभेचा उमेदवार महायुतीचा हा चर्चा करून देईन. त्यावेळेस मात्र तुम्ही सगळ्यांनी त्यांच्या पाठिशी एका जीवाने उभं राहिलं पाहिजे. अशी माझी शिरूरकरांना विनंती आहे.' 

हे ही वाचा>> NCP: 'आमचं आता फाटलंय..', अजितदादा 'हे' काय बोलून गेले?

असं म्हणत अजित पवारांनी अमोल कोल्हेंवर एक प्रकारे निशाणा साधला आहे. तसंच या मतदारसंघावर एक प्रकारे दावाही सांगितला आहे. आता आगामी निवडणुकीत अजित पवारांना हा मतदारसंघ मिळणार का? हे पाहणं महत्त्वाचं ठरणार आहे.