जुन्नर: महाविकास आघाडीतला वाद शमेना, रस्त्यावरच भिडले आजी-माजी आमदार

जुन्नरमधील विकासकामांवर महाविकास आघाडीतील शिवसेनेचे माजी आमदार शरद सोनवणे आणि राष्ट्रवादी काँग्रेसचे आमदार अतुल बेनके यांच्यातच भर कार्यक्रमात शाब्दिक चकमक उडाली असल्याचं पाहायला मिळालं.

यामुळे काही काळ त्या ठिकाणी तणावाचे वातावरण झाले होते. जुन्नर तालुक्यात उंब्रज नंबर 2 या ठिकाणी रस्त्याचे भूमीपूजन कार्यक्रमात आजी-माजी आमदार एकमेकांना भिडल्याचा हा धक्कादायक प्रकार आणि त्याचे व्हीडिओ सोशल मीडियावर व्हायरल झालं आणि मग पुणे जिल्ह्यातील महाविकास आघाडीतली बिघाडी पुन्हा एकदा चर्चेत आली.

महाविकास आघाडीतील शिवसेनेचे माजी आमदार शरद सोनवणे आणि राष्ट्रवादी काँग्रेसचे आमदार अतुल बेनके यांच्यामध्ये भर कार्यक्रमात शाब्दिक चकमक उडाली. एकमेकांना तू-तू, मैं-मै केल्याने काही काळ तणावाचे वातावरण होते. त्यामुळे गावकर्‍यांची मोठी कोंडी झाली होती.