एक अशी मशीद जिथे भोंग्यावरुन अजान होत नाही, कारण ऐकून तुम्हालाही वाटेल अभिमान

महाराष्ट्रात सध्या मशिदीवरील भोंग्यावरुन होणाऱ्या आवाजाचं राजकारण चांगलंच रंगलं आहे. मनसेप्रमुख राज ठाकरे यांनी दिलेल्या अल्टीमेटमनंतर राज्यातील पोलीस यंत्रणेने कायदा-सुव्यवस्थेचा प्रश्न बिघडू नये म्हणून प्रतिबंधात्मक कारवाईही करायला सुरुवात केली आहे. परंतू एकीकडे राज्यात मशिदीवरील भोंग्यांचं राजकारण रंगात आलेलं असताना रत्नागिरीतली एक मशिद आपल्या वेगळ्या प्रयत्नामुळे चर्चेचा विषय बनली आहे.

रत्नागिरीच्या भर बाजारपेठेत मारुती आळीत परकार मशीद आहे. 70 वर्षांपेक्षा जास्त जुनी असलेल्या या मशिदीचं नुकतचं नुतनीकरण करण्यात आलं. परंतू या कामानंतरही मशिदीवर भोंगे लावण्यात आलेच नाहीयेत. परिसरातील मुस्लीम बांधवांनी मशिदीतील अजानसाठी एक अंतर्गत साऊंड सिस्टीम बसवली आहे. ज्याचा आवाज हा फक्त आत मशिदीत नमाज पढायला येणाऱ्यांनाच ऐकायला येतो. सुरुवातीपासूनच भोंग्यावरुन अजान न लावण्याचं या मशिदीचं कारणही तितकंच स्तुत्य आणि कौतुकास्पद आहे.

रत्नागिरीतली सर्वात जुनी शाळा म्हणून ओळख असलेली पटवर्धन हायस्कूल ही याच परिसरात आहे. त्यामुळे शाळेतील विद्यार्थ्यांना आवाजाचा त्रास होऊ नये म्हणून सुरुवातीपासून या मशिदीतली अजान भोंग्यावर होत नसल्याची माहिती मशिदीचे ट्रस्टी इम्रान खलिफे यांनी दिली.