किरण मानेंना ‘मुलगी झाली हो’ मालिकेतून वगळलं, सरपंच युवतीने मालिकेला दाखवला बाहेरचा रस्ता!

या पार्श्वभूमीवर चित्रिकरण सुरू असलेल्या गुळुंब ग्रामपंचायतीने आता या वादात उडी घेतली आहे. वाई तालुक्यातील गुळुंब ग्रामपंचायतीने मालिका चित्रीकरणालाच परवानगीच नाकारली असल्याचं पत्र थेट प्रोडक्शन कंपनीला दिले आहे. यावेळी त्यांनी प्रोडक्शन हाऊसला थेट ‘चले जाव’चा नारा दिला आहे.

ग्रामपंचायतीच्या सरपंच स्वाती शिवाजी माने यांनी या संदर्भात मालिका निर्मात्यांना पत्र दिले असून पॅनोरमा इंटरटेनमेंट प्रायव्हेट लिमिटेड संस्थेला काल (15 जानेवारी) रोजी पत्र देऊन चित्रीकरण थांबविण्याच्या सूचना दिल्या आहेत.

राजकीय भूमिका मांडणाऱ्या मराठी कलावंताला मालिकेतून काढल्याबद्दल मराठी चित्रपट सृष्टीचा व  मालिका प्रोडक्शन कंपनीचा जाहीर निषेध या गुळुंब ग्रामपंचायतीने केला आहे. अभिव्यक्ती स्वातंत्र्यावर कुऱ्हाड चालवणारी स्टार प्रवाह वाहिनी व मुलगी झाली हो या मालिकेच्या प्रोडक्शन व संपूर्ण टीमने महाराष्ट्रात शिवशंभु शाहू फुले आंबेडकरांच्या विचारावर चालणारी लोकशाही नांदते हे विसरू नये. असा सल्ला देखील दिला आहे.

‘मनुवादी विचारसरणीच्या स्टार प्रवाह वाहिनी व मुलगी झाली व मालिकेच्या टीमने आमच्या गावात होत असलेला चित्रीकरणाला ग्रामपंचायत गुळुंब तालुका वाई जिल्हा सातारा मान्यता नाकारत आहे. अशा प्रवृत्तीला इथून पुढे आमच्या गावाच्या हद्दीत चित्रीकरणाला प्रवेश नाही.’ असे ग्रामपंचायतीच्या सरपंच स्वाती शिवाजी माने यांनी स्पष्ट केले आहे.

राजकीय-सामाजिक वादामध्ये सातारचा अभिनेता माने याला मालिकेतून बाहेर काढल्याने एकीकडे गुळुंब ग्रामपंचायतीची प्रोडक्शन कंपनी मालिकेला चित्रीकरणासाठी परवानगी नाकारलेली असताना दुसरीकडे सातारा जिल्ह्यातच यासंदर्भात संतापाची लाट उसळली आहे. त्यामुळे आता दुसऱ्या गावांमध्ये चित्रीकरणासाठी मालिकेला प्रवेश मिळणार की नाही? याकडे आता सातारा जिल्ह्यासह महाराष्ट्राचे लक्ष लागून राहिले आहे.

नेमकं प्रकरण काय?

अभिनेता किरण माने हा नेहमी आपल्या सडेतोड भूमिकेसाठी ओळखला जातो. अभिनयासोबत सोशल मीडियावर अनेक विषयांवर त्याने आपली परखड मतं मांडली आहे. आर्यन खान ड्रग्ज केस प्रकरणापासून ते शेतकरी आंदोलानापर्यंत अनेक विषयांवर किरण माने आतापर्यंत सोशल मीडियावर व्यक्त झाला आहे. अनेकदा यासाठी त्याला ट्रोलिंगही सहन करावं लागलं. 

परंतू याच राजकीय भूमिका घेण्यामुळे किरण मानेला मालिकेतून बाहेर काढण्यात आल्याचा दावा केला जात आहे. काही प्रसारमाध्यमांना दिलेल्या मुलाखतीनंतर फेसबूक पोस्टच्या माध्यमातून किरण मानेने याबद्दल सूचक इशारा दिला होता.

सोशल मीडियावर ही बातमी व्हायरल झाल्यानंतर किरण माने यांनी एक फेसबूक पोस्ट टाकत, ‘मला कितीही संपवण्याचा प्रयत्न केलात तरी मी शांत बसणार नाही.’ असं म्हटलं होतं.

मालिकेतून तडकाफडकी काढणं ही झुंडशाही, शरद पवारांच्या भेटीनंतर किरण माने यांची प्रतिक्रिया

आपल्या भूमिकेबद्दल किरण माने म्हणाला की, ‘शिवबा-तुकोबांच्या आणि शाहू-फुले-आंबेडकरांच्या महाराष्ट्रात हे घडलं आहे, हे लक्षात ठेवा. या महाराष्ट्रात अशी झुंडशाही खरं तर खपवून घेतली जाऊ नये. माझ्या उदाहरणामधून काय घडणार आहे, हे आपण पाहूयात. यात जर मला न्याय मिळाला नाही तर आता झुंडशाहीविरोधात बोलायला कुणीच धजावणार नाही, हे मी तुम्हाला सांगू इच्छितो.’

‘मला न्याय मिळाला तर खूप लोक याविरोधात बोलायला पुढे येतील, काय करायचंय हे लोकांनी ठरवावं. माझ्या सगळ्या पोस्ट्स वाचा, त्यामध्ये कुठेही जातीवादी विखार दिसणार नाही. कुणावर विनाकारण पातळी सोडून केलेली टीका दिसणार नाही.’ असं मत किरण मानेने व्यक्त केलं होतं.