बारामती: अंगणात कोंबड्या आल्या म्हणून शेजाऱ्याने महिलेच्या डोक्यात कुऱ्हाड टाकून केली हत्या

गंगूबाई तात्याराम मोरे असे या घटनेत मयत झालेल्या महिलेचे नाव आहे. या हत्येप्रकरणी आरोपी किरण दादा मोरे याला अटक करण्यात आली आहे.

या संपूर्ण घटनेबाबत तालुका पोलीस ठाण्याचे पोलीस निरीक्षक महेश ढवाण यांनी माहिती देताना सांगितले की, मयत महिला आणि आरोपीचे घर समोरासमोर आहे. दोन्ही कुटुंबामध्ये अंगणात कोंबड्या येण्यावरुन आणि पाच फूटांच्या जागेवरुन वारंवार वाद होत होता.

रविवारी (10 जानेवारी) दुपारी देखील याच कारणामुळे आरोपीच्या बायकोसोबत गंगुबाई यांचा वाद झाला होता. यावेळी रागाच्या भरात किरण याने थेट गंगूबाईच्या डोक्यावर कुऱ्हाडीने वार केला. या हल्ल्यात गंगुबाई गंभीर जखमी झाल्या. त्यामुळे त्यांना तात्काळ उपचारासाठी दवाखान्यात नेण्यात आलं. मात्र त्याआधीच त्यांचा मृत्यू झाला होता.