नियम फक्त सामान्यांसाठी? माजी शिवसेना नगरसेवकाच्या मुलीच्या लग्नात गर्दी, सोशल डिस्टन्सिंगचे तीनतेरा

कल्याण पश्चिमेकडील काळा तलाव परिसरात असलेल्या मॅरेज लॉनमध्ये वायले यांच्या मुलीचा लग्नसोहळा पार पडला. या लग्नसोहळ्याला शेकडो लोकांची गर्दी जमा झाली होती. अशावेळी सोशल डिस्टन्सिंग सोडाच…पण लग्नसोहळ्यासाठी आलेल्या एकाही व्यक्तीने साधा मास्कही घातलेला दिसत नव्हता. एकीकडे कल्याण-डोंबिवली परिसरात सातत्याने रुग्णांच्या संख्येत वाढ होताना दिसत आहे. राज्याच्या अनेक भागांमध्ये रात्री आठ नंतर संचारबंदी लागू करण्यात आली आहे. अशा परिस्थितीत लोकप्रतिनीधींच्या सोहळ्यांना नियम डावलून परवानगी कशी मिळते याबद्दल प्रश्न विचारले जाऊ लागले आहेत.

काही दिवसांपूर्वीच कल्याणमध्ये शिवसेना नगरसेवकाच्या बर्थ-डे सेलिब्रेशनला अशाच पद्धतीने रात्री बारा वाजता, कार्यकर्त्यांची गर्दी झाली होती. ज्यात नगरसेवकाची मिरवणूक काढण्यात आली. इथेही सोशल डिस्टन्सिंग आणि विनामास्क आलेल्या कार्यकर्त्यांकडून नियमांचं सर्रास उल्लंघन करण्यात आलं होतं. त्यामुळे कल्याण-डोंबिवलीतल्या लोकप्रतिनीधींना सामाजिक भान कधी येणार असा प्रश्न जनतेकडून विचारला जात आहे.

ना मास्क, ना सोशल डिस्टन्सिंग! शिवसेना नगरसेवकाचं नियम धाब्यावर बसवून बर्थ-डे सेलिब्रेशन