शिंदे गट शिवसेना भवनासाठी उद्धव ठाकरेंना भिडणार?; गिरीश महाजनांनी काय विधान केलं?

शिवसेनेविरोधात बंडखोरी केल्यानंतर शिंदे आमदारांना घेऊन सुरत मार्गे गुवाहाटीला गेले. परतल्यानंतर शिंदेंनी शिवसेनेच्या काही खासदारांनी आपल्या गटात घेतलं. आमदार आणि खासदारांच्या पाठिंब्यानंतर शिवसेना पक्षप्रमुखांना (उद्धव ठाकरे) बाजूला सारून शिंदेंनी शिवसेनेच्या कार्यकारिणीत बदल केले. स्वतः मुख्यनेता झाले आणि सर्व अधिकार स्वतःकडे घेतले.

शिवसेना मुख्यनेता झालेल्या शिंदेंनी शिवसेना ताब्यात घेण्यासाठी केंद्रीय निवडणूक आयोगाला कार्यकारिणी बदलासंदर्भात पत्र दिलं. एकनाथ शिंदेंकडून झालेल्या या हालचालीनंतर शिवसेना भवनावर शिंदे गट ताबा सांगेल अशीही चर्चा सुरू झाली. त्यानंतर शिंदे गट प्रति शिवसेना भवन उभारणार, असंही म्हटलं गेलं. मात्र, या चर्चेची धूळ हळूहळू खाली बसली.

त्यानंतर आता भाजपचे नेते गिरीश महाजन यांनी केलेल्या विधानाने या चर्चेला पुन्हा तोंड फुटलंय. शिवसेना भवनावर शिंदे गट ताबा सांगू शकतो, ही चर्चा का सुरू झाली. हे समजून घेण्यासाठी गिरीश महाजन यांचं वक्तव्य बघणं महत्त्वाचं आहे.

शिवसेना-शिंदे गटात शिवसेना भवनासाठी मारामाऱ्या होतील; गिरीश महाजन काय म्हणाले?

गिरीश महाजन म्हणाले, “आमचा अडीच वर्षांचा काळ फुकट गेला. आमच्या पाठीत शिवसेनेने खंजीर खुपसला. आमच्याशी गद्दारी करुन राष्ट्रवादी आणि काँग्रेसला जावून मिळाले. मात्र याच फळ शिवसेनेला मिळालं आहे. ५० पैकी चाळीस आमदार गेले. १८ पैकी १२ खासदार गेले. यांच्याकडे काहीच शिल्लक राहिलेलं नाहीये. आता नावासाठी, चिन्हासाठी भांडताहेत. परवा मैदानासाठी भांडत होते, आता काही दिवसांनी शिवसेना भवनसाठी मारामाऱ्या होतील”, असं गिरीश महाजन यांनी म्हणाले.

शिंदे गटाकडून सुरूवातीला शिवसेना भवनासमोरच प्रति शिवसेना भवन उभारी असं म्हटलं होतं. त्यानंतर शिवसेनेकडून करण्यात आलेल्या नियुक्त्यांच्या पत्रात शिंदे गटाच्या शिवसेनेचं मुख्य कार्यालय हे ठाण्यातील टेंभीनाका येथे असल्याचा उल्लेख आहे. त्यामुळे शिंदे गटाकडून शिवसेना भवनावर दावा केला जाणार नाही, असंच बोललं जातं होतं.

दरम्यान, शिवाजी पार्कवर दसरा मेळावा होऊ नये म्हणून शिंदेंकडून ठाकरेंची कोंडी करण्यात आली. उद्धव ठाकरेंच्या शिवसेनेचा दसरा मेळावा शिवाजी पार्कवर होणार की नाही, याबद्दल अनिश्चितताही निर्माण झाली होती. मात्र, शिंदे गटाकडून न्यायालयातही ठाकरेंना शिवाजी पार्क मिळणार नाही, असेच प्रयत्न केले गेले. त्यामुळे शिंदे-ठाकरे यांच्यातील संघर्ष दिसून आला.

त्यात आता गिरीश महाजन यांनी आता शिवसेना भवनासाठी मारामाऱ्या होतील, असं विधान केल्यानं भाजपसोबत गेलेल्या शिंदे गटात शिवसेना भवन ताब्यात घेण्याचे चर्चा सुरूये का? असा प्रश्न उपस्थित झाला आहे. सर्वोच्च न्यायालयातील निकाल प्रलंबित आहे. त्यामुळे केंद्रीय निवडणूक आयोगातील खरी शिवसेना कुणाची हा वादही अनुत्तरित पडलाय. केंद्रीय निवडणूक आयोगातील प्रकरणात शिवसेनेचं चिन्ह धनुष्यबाण आपल्याला मिळेल, असं शिंदे गट म्हणतोय. तर भाजप नेतेही शिंदे गटाला धनुष्यबाण मिळेल, असा दावा करताहेत. त्यामुळेच गिरीश महाजनांच्या विधानाला महत्त्व आलेलं आहे.