एकनाथ शिंदेंची प्रतिशिवसेना, जुनी राष्ट्रीय कार्यकारिणी बरखास्त करत उचललं महत्त्वाचं पाऊल

उपनेतेपदी यशवंत जाधव, गुलाबराव पाटील, उदय सामंत, शरद पोंक्षे, विजय नहाटा आणि शिवाजीराव अढळराव पाटील यांची निवड करण्यात आली आहे. एकनाथ शिंदे हे असं काहीतरी पाऊल उचलणार हे स्पष्टच झालं होतं. अशात आता एकनाथ शिंदे यांनी प्रतिशिवसेनाच स्थापन केली आहे. २१ जून रोजी त्यांनी जे बंड पुकारलं होतं त्यानंतर घडलेल्या घडामोडी महाराष्ट्राने पाहिल्या आहेतच. अशातच रामदास कदम यांनी आज नेतेपदाचा राजीनामा दिला. त्यानंतर आता तेही शिंदे गटात आले आहेत.

शिवसेनेच्या खासदारांमध्येही फूट पडण्याची शक्यता

शिवसेना राष्ट्रीय पातळीवर फुटणार हेदेखील जवळपास निश्चित झालं आहे. शिवसेनेच्या १९ खासदारांपैकी १३ खासदारांनी एकनाथ शिंदे यांनी घेतलेल्या ट्रायडंट हॉटेलमधल्या बैठकीत ऑनलाइन उपस्थिती लावली होती. लोकसभेत शिवसेनेचे नेते म्हणून राहुल शेवाळे यांची निवड करण्यात आली आहे. तर दुसरीकडे प्रतोदपदी भावना गवळी कायम असतील असंही कळतं आहे.

एकनाथ शिंदे यांच्या गटाने २१ जूनला बंड केल्यापासूनच आम्हीच खरी शिवसेना आहोत हे जाहीर केलं आहे. एकीकडे उद्धव ठाकरे हे विविध ठिकाणी पदांवर असलेल्या लोकांची हकालपट्टी करत आहेत. तर दुसरीकडे एकनाथ शिंदे यांनी हे निर्णय घेण्यास सुरूवात केली आहे.