मी भाजपला हरवलं… विजयानंतर बाबूश मोन्सेरात यांची अत्यंत धक्कादायक प्रतिक्रिया, गोव्यात काय घडणार?

‘माझा विजय हा माझ्या कार्यकर्त्यांमुळे झाला आहे. खरं तर मी भाजप आणि काँग्रेस असा दोघांचा पराभव केला आहे.’ असं बाबूश मोन्सेरात यांनी म्हटलं आहे. बाबूश यांची ही प्रतिक्रिया भाजपसाठी धोक्याची घंटा समजली जात आहे.

पाहा बाबूश मोन्सेरात नेमकं काय म्हणाले:

‘मी या निकालाने खूप नाराज आहे. पणजी आणि ताळगाव येथील भाजप पक्ष.. विशेषत: कार्यकर्त्यांनी आम्हाला अजिबात पाठिंबा दिला नाही. ताळगावमध्ये तर भाजपची महिला अध्यक्ष ही स्वत: मतदानाच्या दिवशी काँग्रेसच्या बुथवर बसली होती. असंच पणजीमध्ये देखील घडलं.’

‘त्यामुळे मी जो पराभव केला आहे तो काँग्रेस आणि भाजप या दोघांचाही पराभव केला आहे. आजचा विजय हा फक्त माझ्या कार्यकर्त्यांमुळे झाला आहे. मी कोणाला पाठिंबा देणार हे नंतर सांगेन.’ अशी प्रतिक्रिया बाबूश मोन्सेरात यांनी दिली आहे. बाबूश यांच्या याच विधानाने भाजपला मात्र मोठा धक्का बसला आहे.

कोण आहेत बाबुश मोन्सेरात?

बाबुश यांचं संपूर्ण नाव अंतान्सिओ उर्फ बाबुश मोन्सेरात असं आहे. आपल्या कारकिर्दीची सुरुवात बाबुश यांनी मंत्र्यांचे खासगी स्वीय सहायक म्हणून केली. ताळगाव मतदार संघातून आमदार आणि मंत्री राहिलेल्या सोमनाथ जुवारकर यांचे बाबुश हे स्वीय सहाय्यक होते. परंतू जुवारकर यांच्यासोबतचे संबंध बिघडल्यानंतर बाबुश यांनी स्वतःचा वेगळा मार्ग पकडत 2002 मध्ये युनायटेड गोवन्स डेमोक्रॅटीक पार्टीची स्थापना केली होती.

बाबुश हे इथेच थांबले नाहीत तर त्यांनी मुद्दाम जुवारकर यांचा मतदारसंघ निवडणुकीसाठी निवडला आणि २ हजार मतांनी विजय मिळवत पहिल्यांदा गोव्याच्या राजकारणात आपलं नाव चर्चेत आणलं. 2002 साली तत्कालिन मुख्यमंत्री मनोहर पर्रिकर यांना तीन जागांची गरज असताना बाबुश यांनी त्यांना आपला पाठिंबा दिला होता. मात्र 2005 सालात बाबुश आणि अन्य दोन आमदारांनी पाठींबा काढून घेतल्यामुळे पर्रिकर सरकार पडलं होतं.

2005 साली गोव्यात प्रतापसिंह राणे यांचं सरकार आलं आणि बाबुश यांना मंत्रीपदाची लॉटरी लागली. 2007 साली बाबुश यांनी पुन्हा ताळगाव मतदार संघातून निवडणूक लढवली. 2012 मध्ये बाबुश यांनी ताळगाव हा आपला सुरक्षित मतदारसंघ पत्नी जेनिफर मोन्सेरात यांच्यासाठी सोडला आणि स्वतःसाठी सांताक्रुझ मतदारसंघाची निवड केली. 2017 साली बाबुश यांना पहिल्यांदा पराभवाचा सामना करावा लागला. पणजी मतदारसंघातून बाबुश पराभूत झाले.

Goa Election Counting : गोव्यात उत्पल पर्रिकरांचं बंड फसलं, बाबुश मोन्सेरात विजयी

दरम्यानच्या काळात केंद्राची वारी करुन आलेले मनोहर पर्रिकर पुन्हा गोव्याच्या राजकारणात परतले. त्रिशंकु परिस्थिती निर्माण झालेली असताना इतर पक्षाच्या सदस्यांनी मनोहर पर्रिकर गोव्यात परतले तरच भाजपला पाठींबा देऊ ही अट घातल्यानंतर केंद्राने मनोहर पर्रिकरांना गोव्यात पाठवलं. त्यावेळी पणजीचे आमदार सिद्धार्थ कुंकळेकर यांनी पर्रिकरांसाठी आपली जागा सोडली. पर्रिकर पणजीच्या जागेतून निवडून आले.