अजित पवार यांनी घेतली एकनाथ शिंदे यांची भेट; मुख्यमंत्र्यांपुढे लावली प्रश्नांची माळ

अजित पवार यांनी एकनाथ शिंदे यांना दिलेल्या पत्रात काय म्हटलं आहे?

प्रामुख्यानं अतिवृष्टी आणि पूरामुळे शेतीचं मोठं नुकसान झालं आहे, खरिपाचे संपूर्ण पीक गेले असून रब्बी हंगामातील पेरणीचंही प्रचंड नुकसान झालं आहे. बऱ्याच ठिकाणी जमिनी वाहून गेल्या असून घरांचीही मोठ्या प्रमाणावर पडझड झाली आहे. त्यामुळे राज्यात तातडीने ओला दुष्काळ जाहीर करुन शेतकऱ्यांना एनडीआरएफ आणि एसडीआरएफच्या निकषाच्या बाहेर जाऊन तातडीने मदत देण्यात यावी, अशी मागणी करण्यात आली.

राष्ट्रवादी काँग्रेस पक्षाचे नेते आणि विधानसभेचे विरोधी पक्षनेते @AjitPawarSpeaks यांनी आज वर्षा या निवासस्थानी माझी सदिच्छा भेट घेतली. राज्यात परतीच्या पावसामुळे शेतकऱ्यांचे झालेले नुकसान, पुणे शहरात झालेली अतिवृष्टी यांसह अनेक विषयांवर चर्चा करण्यात आली. pic.twitter.com/lsXOMvCtuI

— Eknath Shinde – एकनाथ शिंदे (@mieknathshinde) October 19, 2022

तसंच पुण्यातील प्रश्नांकडेही यावेळी त्यांनी मुख्यमंत्री शिंदे यांचं लक्ष वेधलं. पुणे महापालिकेमध्ये नव्यानं समाविष्ट झालेल्या ३४ गावांमधील पाणी, रस्ता, कचरा, ड्रेनेज अशा मुलभूत सोयींसाठी तातडीनं निधी द्यावा, अशी मागणी त्यांनी केली. महानगरपालिकेत समाविष्ट होऊनही पुरेसा निधी न मिळाल्यानं या गावांमध्ये राहणाऱ्या नागरिकांना प्रचंड त्रास होत असल्याचं त्यांनी सांगितल. तसंच वडगावशेरी विधानसभा मतदारसंघातील नागरिकांचा पुनर्वसनाचा प्रश्न मार्गी लावण्याची मागणीही त्यांनी केली.

तूर्तास पुण्यातील जनतेला आवश्यक ती सर्व मदत करणं गरजेचं आहे. यासाठी आम्ही पाठपुरावा करतंच आहोत. जनतेनं देखील आवश्यक ती काळजी घ्यावी असं आवाहन करतो. सर्व प्रशासकीय यंत्रणा आवश्यक ती पाऊलं उचलून स्थिती पूर्वपदावर आणण्यासाठी युद्धपातळीवर काम करत असून त्याचा आढावा आम्ही घेत आहोत.

— Ajit Pawar (@AjitPawarSpeaks) October 18, 2022

पुण्यात नुकत्याच झालेल्या मुसळधार पावसामुळे शहरातील अनेक भागात पाणी साचण्याचे प्रकार झाले होते. हा प्रश्नही मुख्यमंत्री शिंदे यांच्यापुढे पवार यांनी मांडला. स्मार्ट सिटीचं स्वप्न दाखवून भाजपनं पुणे शहराचं पार वाटोळं करून ठेवलं आहे. काल सायंकाळी अतिवृष्टीमुळे भाजपशासित पुणे मनपानं काय दिवे लावलेत याची कल्पना येते. लोकांना प्रचंड मनस्ताप सहन करावा लागला आहे. मनपाला ‘अव्यवस्थेची’ कारणं काय आहेत ती सांगावीच लागतील, असं नुकतचं त्यांनी ट्विट करुन म्हटलं होतं.

यासोबतच राज्यातील विकास कामांवरील स्थगिती उठवावी, आशा सेविकांना किमान वेतनं लागू करावं, अहमदनगर येथील बर्डे कुटुंबियांना आर्थिक मदत मिळावी, बदलापूर शहरातून जाणाऱ्या उल्हास नदीवरील पूर नियंत्रण रेषा संदर्भांत सर्वसामान्यांना विचारात घ्यावे, विनाअनुदानित शाळांचा प्रश्न सोडवावा, अशा अनेक मागण्या या पत्रातून विरोधी पक्ष नेते अजित पवार यांनी केली.