सातारा : गर्भवती वनरक्षक महिलेला माजी सरपंचाकडून लाथाबुक्क्यांनी बेदम मारहाण; व्हिडीओ व्हायरल

एका गर्भवती वनरक्षक महिलेला माजी सरपंचाने लाथाबुक्क्यांनी मारहाण केल्याची संतापजनक घटना समोर आली आहे. या घटनेचा व्हिडीओ समोर आला असून, या प्रकरणी सातारा तालुका पोलीस ठाण्यात तक्रार दाखल करण्यात आली आहे. या घटनेचा व्हिडीओ व्हायरल झाल्यानंतर नागरिकांमधून संताप व्यक्त केला जात आहे.

सिंधू सानप असं वनरक्षक महिला कर्मचाऱ्याचं नाव असून, रामचंद्र जानकर असं मारहाण करणाऱ्या माजी सरपंचाचं नाव आहे. यावेळी माजी सरपंचाच्या पत्नीने सिंधू सानप यांचे पती सूर्याजी ठोंबरे यांना चप्पलेनं मारहाण केली.

साताऱ्यात पळसवडे गावचे माजी सरपंच रामचंद्र जानकर यांनी महिला वनरक्षक सिंधू सानप आणि त्यांचे पती सूर्याजी ठोंबरे यांना लाथा बुक्क्यांनी बेदम मारहाण केल्याची घटना बुधवारी दुपारी घडली आहे. वनरक्षक महिला कर्मचारी सिंधू सानप या 3 महिन्यांची गर्भवती असून, त्यांच्या पोटात लाथा आल्याचा आरोप सरपंचावर करण्यात आला आहे. यावेळी त्यांच्या डोक्यात दगड देखील मारल्याचं त्यांनी म्हटलं आहे.