महाराष्ट्राच्या राजकारणात चाललंय काय? आता एकनाथ खडसे शरद पवारांच्या भेटीला

महाराष्ट्राच्या राजकारणात चाललंय काय? असा प्रश्न आता राजकीय वर्तुळात चर्चिला जातो आहे. याचं कारण आहे ते म्हणजे गेल्या तीन दिवसांमध्ये घडलेल्या घडामोडी. सोमवारी देवेंद्र फडणवीस यांनी राष्ट्रवादीचे सर्वेसर्वा शरद पवार यांची भेट घेतली. त्यामुळे अनेकांच्या भुवया उंचावल्या गेल्या होत्या. त्यानंतर दुसऱ्या दिवशी म्हणजे मंगळवारी देवेंद्र फडणवीस हे जळगाव दौऱ्यावर होते त्यावेळी ते एकनाथ खडसेंच्या घरी गेले होते. तिथे त्यांनी भाजप खासदार रक्षा खडसेंची भेट घेतली होती. मात्र देवेंद्र फडणवीस हे खडसेंच्या घरी गेल्याने पुन्हा एकदा राजकीय वर्तुळात विविध चर्चा रंगल्या. या चर्चा थांबत नाहीत तोच आज राष्ट्रवादीचे नेते एकनाथ खडसे यांनी शरद पवारांची भेट घेतली. एकनाथ खडसे यांनी ट्विट करून यासंदर्भातली माहिती दिली आहे.