विमान प्रवासाच्या वादावर राज्यपाल कार्यालयाने कुणाकडे दाखवलं बोट?

महाराष्ट्राचे राज्यपाल भगतसिंग कोश्यारी यांना आज (11 फेब्रुवारी) महाराष्ट्र सरकारने विमान प्रवासास परवानगी नाकारल्याने एकच वादंग निर्माण झाला आहे. या सर्व प्रकारामुळे शिवसेना आणि भाजपच्या नेत्यांनी एकमेकांवर आरोपाच्या फैरी झाडण्यास सुरुवात केली आहे. यानंतर आता राज्यपालांच्या कार्यालयांकडून स्पष्टीकरण देण्यात आलं आहे. त्यात त्यांनी असं म्हटलं आहे की, ‘मुख्यमंत्री कार्यालय आणि राज्य सरकारला संबंधित प्रवासाबाबत २ फेब्रुवारीला कळविण्यात आलं होतं. पण असं असून देखील आज राज्यपाल विमानात बसल्यानंतर त्यानंतर सांगण्यात आलं की, राज्य सरकारकडून जी परवानगी लागते ती मिळालेली नाही. त्यामुळे आपल्याला प्रवास करता येणार नाही.’ असं स्पष्टीकरण देत राज्यपालांनी आता एकप्रकारे राज्य सरकारवरच थेट टीका केली आहे.