Shiv Sena vs Rana: नवनीत राणांनी माघार घेताच.. शिवसेनेने हेरली संधी; गाठलं खिंडित!

‘राणा दाम्पत्य शिवसेनेला सतत डिवचत आहेत. चिथावणीखोर वक्तव्य करत आहेत. दोन गटांमध्ये दंगली उसळाव्यात अशी त्यांची इच्छा आहे. त्यामुळे शिवसेनेने आता त्यांच्या विरोधात पोलिसात तक्रारही दाखल केली आहे.’ अशी माहिती देखील अनिल परब यांनी दिली आहे.

पाहा अनिल परब नेमकं काय म्हणाले:

‘हिंदूत्व यांच्याकडून आम्हाला शिकण्याची गरज नाही. 92-93 च्या दंगली मुंबईत झाल्या तेव्हा राणा दाम्पत्य कुठे होते? यांच्याकडून हिंदूत्व शिकण्याची वेळ शिवसेनेवर आलेली नाही. जो अतिरेकपणा त्यांनी गेले दोन दिवस केला मुंबईतील शिवसेनेला आव्हान दिलं. मातोश्री हे आमचं दैवत आहे. या दैवतावर जरी कोणी वाकडं नजर करुन बघत असेल तर शिवसैनिक कोणाचंही ऐकणार नाहीत.’

‘शिवसैनिकांनी अद्याप कोणताही कायदा हातात घेतलेला नाही. आम्ही शांतपणे त्यांच्या घराखाली बसून आहोत. जो पर्यंत ते माफी मागत नाहीत किंवा पोलीस त्यांच्यावर कोणत्याही प्रकारची कारवाई करत नाहीत तोपर्यंत शिवसैनिक इथून हलणार नाहीत.’

‘मोहित कंबोजला तिकडे येऊन शिवसेनेला डिवचण्याचं काहीही काम नव्हतं. जाणूनबुजून अशाप्रकारे शिवसैनिकांना डिवचण्याचं काम कोणी करत असेल तर शिवसैनिकांचा राग व्यक्त होणं स्वाभाविक आहे.’

‘शिवसेनेला जाणूनबुजून डिवचायचं, शिवसैनिकांना डिवचायचं हे सध्या काही जणांकडून मुद्दाम केलं जात आहे. जशी राज्यात कायदा-सुव्यवस्था राखण्याची जबाबदारी सरकारची आहे तशीच विरोधी पक्षाची देखील आहे.’

‘माघार घेऊन हा प्रश्न संपणार नाही. गेले दोन दिवस मुंबईतील वातावरण हे खराब केलं आहे. समाजात प्रक्षोभक भाषणं केली आहेत. आता देखील त्यांनी शेवटची जी मुलाखत दिली त्यातही त्यांनी प्रक्षोभक भाषण केलं. त्याच्याविरोधात पोलिसात आम्ही तक्रार देत आहोत. या गुन्ह्याची दखल पोलिसांनी घ्यावी अशी विनंती आहे. नाहीतर त्यांनी शिवसेनेची माफी मागावी आणि हे प्रकरण इथे संपवावं.’

‘कुठल्याही गोष्टीचा एक संयम असतो. पण संयमाची परिसीमा कोणीही ओलांडू नये अशी सर्वसाधारण अपेक्षा असते. विरोधी पक्षाला जे-जे करायचं आहे त्यासाठी त्यांचा मार्ग मोकळा आहे. महाविकास आघाडीला जी कामं करायची आहे ती आम्ही जरुर करु.’

‘महाविकास आघाडीचं सरकार भक्कम आहे. जेवढी गरज आमदारांची लागते सरकार बनविण्यासाठी त्यापेक्षा किती तरी जास्त आमदार आमच्याकडे आहेत. त्यामुळे राष्ट्रपती राजवट हे नुसतं भूत उभं केलं जात आहे. त्याची भीती निर्माण केली जात आहे. अशा कोणत्याही भीतीला महाविकास आघाडी बळी पडणार नाही.’

‘शिवसैनिक हा दररोज मारुती स्तोत्र वाचतो. त्यामुळे त्याला रस्त्यावर येऊन हनुमान चालीसा वाचण्याची गरज नाही. ज्याला काही चालीसा वाचायचा आहे त्याने घरात वाचावं. आम्ही उद्या त्यांच्या घरात जाऊन चालीसा वाचला तर?’

‘पंतप्रधान यांचा उद्या जो कार्यक्रम आहे त्यात कोणतीही आडकाठी केली जाणार. हा कार्यक्रम निर्विघ्नपणे पार पडेल. आयोजनाप्रमाणेच हा सर्व कार्यक्रम आहे.’

Rana vs Shiv Sena: मोठी बातमी… ‘मातोश्री’वर जाणार नाही!, नवनीत-रवी राणांनी ‘हट्ट’ सोडला

‘पण ज्यांना घरातून बाहेर पडता आलं नाही आता पळवाट काढण्यासाठी पंतप्रधानांच्या दौऱ्याबाबत बोललं जात आहे. ही लोकं वारंवार माथी भडकवणारे वक्तव्य करत आहेत. दोन गटात दंगल व्हावी ही त्यांची इच्छा आहे. त्यामुळेच राणा यांच्याविरोधात आम्ही पोलीस तक्रार करणार आहोत.’ असं यावेळी अनिल परब म्हणाले.

दरम्यान, आता अनिल परब यांच्या या मागणीनंतर राणा दाम्पत्य काय भूमिका घेणार हे पाहणं महत्त्वाचं ठरणार आहे.