क्रिस रॉक प्रकरणावरून धडा घ्या! अतिरेक कराल तर कानशिलात बसणारच, शिवसेनेचा भाजपला इशारा

काय म्हटलं आहे अग्रलेखात?

ऑस्कर सोहळ्यात विल स्मिथने होस्ट क्रिस रॉकच्या जी जोरदार कानशिलात लगावली त्याची जगभरात चर्चा झाली. या घटनेच्या दोन दिवस आधी पाटण्यात एका माथेफिरू तरूणाने नितीशकुमार यांच्या कानशिलात लगावण्याचा प्रयत्न केला. हा काही अतिरेकी हल्ला किंवा दहशतवादी हल्ला नव्हता. शरद पवारांपासून अनेक नेत्यांच्या बाबतीत असे प्रसंग ओढावले आहे. पंडित नेहरूंनाही स्वातंत्र्य मिळाल्यानंतर फाळणीच्या निर्वासितांच्या रोषाला सामोरं जावं लागलं होतं.

ऑस्करच्या मंचावर जो प्रकार घडला त्याचं एका ओळीत वर्णन करता येईल ते म्हणजे क्रिस रॉकने ताळतंत्र सोडलं त्यामुळे विल स्मिथचा संमय सुटला. क्रिस रॉकने विल स्मिथच्या पत्नीची जी मस्करी केली त्यामुळे विल स्मिथ चिडला आणि त्याने उठून रॉकच्या कानशिलात लगावली. एखाद्या विद्रोही शिवसैनिका प्रमाणे विल स्मिथने क्रिस रॉकवर हल्ला केला. क्रिस रॉक प्रकरणाचा धडा हा आहे की अतिरेक कराल तर कोणत्याही मंचावर तुमच्या कानशिलात बसू शकते. आता क्रिस रॉकच्या कानशिलात लगावल्याबद्दल महाराष्ट्रातील भाजप नेत्यांनी एखादे निषेधाचे पत्रवगैरे काढून त्याला सुरक्षा देण्याची मागणी केली आहे का हे बघावं लागेल.

ऑस्करचा पुरस्कार सोहळा हा परदेशी भूमिवर असला तरी हरकत नाही. भाजप हा आंतरराष्ट्रीय पक्ष आहे. रॉकसारखे पांचट लोक त्यांना हवेहवेसे असतात. ऑस्करसा सोहळा लॉस एंजेलिसला झाला, तिथेही भाजपला प्रिय वाटणारे नग आहेत. रॉकने व्यक्तीगत पातळीवर टीका केली त्यामुळे त्याला फटके पडले. विल स्मिथने घडल्या प्रकारानंतर माफी मागितली भावनेच्या भरात कृत्य झाल्याचं स्पष्ट केलं. मात्र रॉकने भान सोडलं नसतं तर विल स्मिथ बेभान झालाच नसता.

सध्या महाराष्ट्रातील भाजपनेही क्रिस रॉकसारखेच वर्तन सुरू केलं आहे. क्रिस रॉकपेक्षाही खालच्या पातळीवर भाजपचं वर्तन पोहचलं आहे. भाजपमध्ये नुकतेच वऱ्हाडी म्हणून आलेले नगरचे विखे-पाटील यांनीही नुकतेच क्रिस रॉकप्रमाणेच वक्तव्य केले. त्यानंतर राष्ट्रवादीचे विल स्मिथ जयंत पाटील भडकले. सत्तेसाठी एकत्र आलेल्या महाविकास आघाडीतील राष्ट्रवादी-शिवसेनेला विखेंनी नवरा बायकोची आणि काँग्रेसला बिन बुलाये वऱ्हाडींची उपमा दिली. या क्रिस रॉकला जयंत पाटील यांनी अशी काही शाब्दिक कानशिलात लगावली की लोकांना तीन फुल्यांचा वापर करून पाटलांचे फटके वर्णन करावे लागले. भाजपचे टवाळ पुढारी महाराष्ट्राच्या बदनामीची सुपारी घेतल्या प्रमाणे बेबंद वागत आहेत. मर्यांदाचे भान राखायला ते तयार नाहीत. क्रिस रॉकने मर्यादा सोडली तेव्हा त्याला कानशिलात खावी लागील. त्या थपडेनंतर तोदेखील कोलमडला. भाजपचे देशी क्रिस रॉक गेल्या अडीच वर्षांपासून महाविकास आघाडीच्याबाबत घाणेरड्या पद्धतीने नौटंकी करत आहेत. असल्या नौटंकीस एक दिवस कानशिलात बसणारच!