आज लसीकरणाला सुट्टी नाही, मुंबईतील सर्व केंद्र सुरु राहणार

आज सर्व लसीकरण केंद्रे खुले राहतील!

लसीकरण मोहीम अधिक जोमाने सुरु ठेवण्यासाठी आज शहरातील सर्व लसीकरण केंद्रे सुरू ठेवण्यात येतील.

४५+ वर्ष वय असलेल्या व्यक्तींनी आधार कार्ड/पॅन कार्ड/इतर ओळखपत्रासह लसीकरण केंद्रास भेट द्या.#JabToBeatCorona

— माझी Mumbai, आपली BMC (@mybmc) April 4, 2021

१ एप्रिलपासून देशभरासह राज्यात लसीकरणाचा चौथा टप्पा सुरु झाला आहे. या टप्प्यात ४५ वर्षांवरील सर्व व्यक्तींना लस दिली जाणार आहे. दरम्यान काल, मुंबईत दिवसभरात ९ हजार ९० नव्या कोरोना पॉझिटिव्ह रूग्णांची भर पडली आहे. दिवसभरात ५ हजार ३२२ लोक कोरोना मुक्त झाले आहेत. तर २७ जणांचा मृत्यू कोरोनामुळे झाला आहे. आज घडीला मुंबईत ६२ हजार १८७ अॅक्टिव्ह केसेस आहेत. आत्तापर्यंत मुंबईत कोरोनाची लागण झालेल्या एकूण ३ लाख ६६ हजार ३६५ जणांनी कोरोनावर मात केली आहे. तर मुंबईत आत्तापर्यंत एकूण ११ हजार ७५१ रूग्णांचा कोरोनामुळे मृत्यू झाला आहे. मुंबई महापालिकेच्या आरोग्य विभागाने ही माहिती दिली आहे.

मुंबईचा डबलिंग रेट अर्थात रूग्ण दुप्पट होण्याचे प्रमाण हे ४८ वरून ४४ दिवसांवर आलं आहे २७ मार्च ते २ एप्रिल या कालावधी रूग्ण वाढीचा दर हा १.५४ टक्के इतका नोंदवण्यात आला आहे. मुंबईतील कोरोना रूग्ण बरे होण्याचे प्रमाण अर्थात रिकव्हरी रेट हा ८३ टक्के झाला आहे. अशीही माहिती मुंबई महापालिकेच्या आरोग्य विभागाने दिली आहे.