प्रकाश आंबेडकरांचं कौतुक, भाजपवर टीका : उद्धव ठाकरेंकडून शिवशक्ती-भीमशक्ती युतीचे संकेत

मागील अनेक दिवसांपासून शिवसेना (ठाकरे गट) – वंचित बहुजन आघाडी युतीची चर्चा सुरु आहे. याबाबत स्वतः वंचित बहुजन आघाडीचे प्रमुख प्रकाश आंबेडकर यांनी आपण उद्धव ठाकरे यांना प्रस्ताव पाठविला असल्याचं सांगितलं आहे. अशातच ‘प्रबोधनकार.कॉम’ या संकेतस्थळाच्या लॉंचिंग कार्यक्रमात आज उद्धव ठाकरे आणि प्रकाश आंबेडकर एकाच व्यासपीठावर आले होते.

उद्धव ठाकरे काय म्हणाले?

यावेळी बोलताना उद्धव ठाकरे म्हणाले, आतापर्यंत शिवसेनेच्या प्रत्येक कार्यक्रमात छत्रपती शिवाजी महाराज आणि डॉ. बाबासाहेब आंबेडकर यांच्या प्रतिमेच पूजन करुन कार्यक्रमाची सुरुवात केली गेली. आजही तशीच सुरुवात झाली. पण आज याला एक कौटुंबिक रुप आलं आहे. दोन नातू एकत्र आले आहेत.

उद्धव ठाकरेंकडून प्रकाश आंबेडकरांचे कौतुक :

काही वर्षांपूर्वी कलिना इथे एक कार्यक्रम झाला होता. त्यात रामदास आठवले माझ्यासोबत होते. ते मला म्हणाले होते, उद्धवजी तुम्ही प्रबोधनकारांचे नातू आणि आम्ही वैचारिक नातू. म्हटलं असं असेल तर नातू-ना मी असं कशाला. चला एकत्र येऊ. आज मला आनंद आहे, अभिमान आहे. असं काही नाही की माझी आणि प्रकाशजींची ओळख नाही. बोलतो. मध्ये-मध्ये भेटलेलोही आहे. पण त्यांच्यासोबत भेटायचं म्हणजे वेळ काढून भेटायला पाहिजे. कारण माहिती आणि ज्ञान याचा धबधबा याला मिनिटांचं गणित नाही.