राहुल गांधींनी माफी मागण्यात वाईट काय? आशिष देशमुखांचे खरमरीत उत्तर

आशिष देशमुख यांनी शिस्तभंग समितीचे अध्यक्ष पृथ्वीराज चव्हाण यांना उत्तर पाठवलं आहे. यात देशमुख म्हणतात, “मला देण्यात आलेल्या कारणे दाखवा नोटिसमध्ये दोन मुद्दे आहेत. पहिला मुद्दा आहे राहुल गांधींना दिलेल्या सल्ल्याबद्दलचा आहे. मी राहुल गांधी यांना ओबीसी समाजाची माफी मागण्याचा सल्ला दिला होता. याचा योग्य अर्थ लावण्यासाठी संदर्भ समजून घेण्याची गरज आहे. मोदी आडनावाच्या व्यक्तींबद्दल राहुल गांधींनी विधान केलं होतं. त्यामुळे त्यांना 2 वर्षांची शिक्षा दिली आणि त्यामुळे त्याची खासदारकी रद्द करण्यात आली.”

राहुल गांधींनी माफी मागण्यात वाईट काय? आशिष देशमुखांचा सवाल

आशिष देशमुख पत्रात म्हणतात, “राहुल गांधींनी संपूर्ण ओबीसी समाजाचा अपमान केला, असा अर्थ लावला जात आहे. माझा सल्ला पक्ष हितासाठी होता. ओबीसी समुदायात काँग्रेसविरुद्ध कुठली भावना असेल, तर माफी मागून संपवली जावी. माझा सल्ला तथ्यावर आधारित आहे. भारतात ओबीसींची सख्या एकूण लोकसंख्येपैकी 54 टक्के आहे. काँग्रेसने नेहमी ओबीसींचं समर्थन केलं आहे. अशात जर या समुदायाच्या भावना दुखावल्या गेल्या असतील, तर माफी मागण्यात वाईट काय?”, असं देशमुख यांनी म्हटलं आहे.

“चौकीदार चौर है प्रकरणात राहुल गांधींनी माफी मागितली आहे. त्यांनी राफेल प्रकरणातही 2019 मध्ये सर्वोच्च न्यायालयात बिनशर्थ माफी मागितली आहे. आताचं प्रकरण लवकर संपावं म्हणून मी माफी दिली. पक्षाला मजबूत करण्यासाठी ओबीसींना सोबत घ्यायला हवं”, अशी भूमिका आशिष देशमुख यांनी पत्रात मांडली आहे.

काँग्रेसचे नेते कारणे दाखवा नोटीसवर जास्त बोलत आहेत, देशमुखांचे चिमटे

देशमुख यांनी म्हटलं आहे की, “हे हास्यास्पद आहे की, काँग्रेस स्वतःला लोकशाही पक्ष मानतो आणि त्यांच्याच नेत्यांनी लोकशाही पद्धतीने दिलेले सल्ल्यांमुळे कारणे दाखवा नोटीस पाठवतो. महाराष्ट्र आणि इतर राज्यात काँग्रेसमध्ये ओबीसी नेते आहेत. ते ओबीसींसाठी काय करत आहेत? जनतेची नाराजी, त्यांचे हक्क मिळवून देण्यासाठी काय करत आहेत? दुर्दैवाने काहीच नाही. पक्ष वाईट अवस्थेतून जात असताना हे लोक गटबाजी करण्यात आनंद मानत आहेत. घराणेशाही पद्धतीने काँग्रेस कुमकुवत करत आहेत. त्यांचं मौन आणि निष्क्रियता वेगवेगळ्या विधानांवर आणि कारण दाखवा नोटिसीवर ते जास्त बोलतात.”

हेही वाचा >> शरद पवारांचा थेट राहुल गांधींवर हल्ला, अदाणींवरील आरोपांवरून पिळले कान

“मी ओबीसींच्या विकासासाठी कटिबद्ध आहे, हे सगळ्यानांच माहिती आहे. त्यापरीने मी प्रयत्नही करत आहे. काँग्रेसच्या नेत्यांनी इतर पक्षांकडे बघावं, हे सांगण्याचं धाडस माझ्याकडे आहे. भाजपने ओसीबीपर्यंत जाण्यासाठी कार्यक्रम हाती घेतला. त्यांच्यासाठी अनेक योजना लागू केल्या आहेत. दुसरीकडे काँग्रेसला ओसीबींबद्दल कोणतीही चिंता नाही. उलट दिलेल्या सल्ल्यांचा चुकीचा अर्थ काढला जात आहे.”

पक्षासमोरील आव्हानं आणखी वाढतील, आशिष देशमुख यांचा इशारा

आशिष देशमुख यांनी ओसीबींच्या मुद्द्यावरून काँग्रेसला इशारा दिला आहे. देशमुख यांनी म्हटलं आहे की, “प्रदेशाध्यक्षांबद्दल काढलेल्या खोका शब्दाचं स्पष्टीकरण मी देणार नाही. त्याचा अर्थ काढण्याची जबाबदारी महाराष्ट्रातील काँग्रेस नेत्यांवर टाकतो. मी पुन्हा एकदा सांगतो की, काँग्रेसने ओसीबींची उपेक्षा केली तर पक्षासमोरील आव्हाने आणखी वाढतील. कारणे दाखवा नोटिसीऐवजी महाराष्ट्रातील काँग्रेस नेत्यांनी ओसीबींच्या कल्याणासाठी बुद्धी, शब्द आणि कामाचा उपयोग करावा, असा माझा सल्ला आहे.”

हेही वाचा >> राहुल गांधी यांना पुन्हा खासदार होण्यासाठी काय आहेत पर्याय?

“मी पक्ष आणि कार्यकर्त्यांसोबत ओबीसींच्या कल्याणासाठी बोलत आहे. मला लक्ष्य करण्यासाठी माझ्या विधानांचा चुकीचा अर्थ लावला जात आहे. माझ्याविरोधातील मोठ्या षडयंत्राचाच भाग आहे, कारण मी नेत्यांच्या कार्यशैलीवरच प्रश्न उपस्थित करत आहे. काँग्रेसने मला नोटीस पाठवून आपल्याच लोकशाही परंपरेचा अपमान केला आहे. मी शांत आणि दृढ निश्चयी आहे, हे सगळ्यांनी लक्षात ठेवाव”, असं उत्तर आशिष देशमुख यांनी कारणे दाखवा नोटीसला दिले आहे.