शरद पवारांना रोखलं?

या आंदोलनादरम्यान शरद पवार प्रत्यक्ष घटनास्थळी पोहोचले असताना त्यांना जखमी विद्यार्थ्यांना भेटण्यापासून रोखण्यात आल्याचा गंभीर आरोप कार्यकर्त्यांनी व नेत्यांनी केला आहे. पवारांचे वय आणि प्रकृती लक्षात घेता, त्यांना मोठा वळसा घालून येणे किंवा स्टेजच्या उंच पायऱ्या चढणे अशक्य होते. त्यामुळे समोरचे बॅरिकेड्स केवळ पाच मिनिटांसाठी बाजूला करून पवारांना आत येऊ द्यावे, अशी विनंती पोलिसांकडे करण्यात आली होती. जेणेकरून पवार थेट समोर बसलेल्या जखमी विद्यार्थ्यांना भेटून त्यांची विचारपूस करू शकले असते. मात्र, पोलिसांनी ही विनंती फेटाळून लावत बॅरिकेड्स हटवण्यास स्पष्ट नकार दिला आणि केवळ इकडून तिकडे अधिकाऱ्यांकडे बोट दाखवून वेळ काढूपणा केला.

हे ही वाचा : Maharashtra Weather : मुंबईसह राज्यातील 'या' जिल्ह्यांत वरुणराजाचं रौद्ररूप; IMD चा अंदाज

अभिजीत दिपके काय म्हणाले?

पोलिसांच्या या आडमुठ्या भूमिकेवर आंदोलकांनी आणि अभिजित दीपके यांनी अत्यंत तीव्र शब्दांत संताप व्यक्त केला आहे. केरळ हाऊसपर्यंत संपूर्ण परिसर छावणीचे रूप धारण करून पोलिसांनी कडेकोट बंदोबस्त तैनात केला होता. "मुलींवर आणि मुलांच्या मानेवर लाठ्या मारणाऱ्या पोलिसांना एका ज्येष्ठ खासदाराला आणि पक्षाध्यक्षांना विद्यार्थ्यांना भेटू देण्याचे सौजन्य दाखवता आले नाही," असा आरोप आंदोलकांनी केला. शरद पवार जखमी विद्यार्थ्यांना भेटल्यास आंदोलनाला अधिक मोठे स्वरूप प्राप्त होईल आणि ही बातमी देशभर गाजेल, याच भीतीने पोलिसांनी पवारांना आत येऊ दिले नाही, असा थेट दावाही कार्यकर्त्यांनी केला आहे. शेवटी पोलिसांच्या या वागण्यावर वेळ न घालवता पवारांनी बाहेरूनच आपला पाठिंबा व्यक्त केला.

हे ही वाचा : 'परवानगीशिवाय ती रुममध्ये आली अन्...' महिला IPS अधिकाऱ्यावर गंभीर आरोप, काय घडलं?

आंदोलकांच्या प्रमुख मागण्या

या आंदोलनातून आता विरोधक आणि विद्यार्थ्यांचा लढा अधिक तीव्र होण्याची चिन्हे आहेत. पेपरफुटीमुळे आत्महत्या केलेल्या विद्यार्थ्यांच्या कुटुंबांना एक कोटी रुपयांची भरपाई मिळावी, सोनम वांगचुक यांची तातडीने सुटका व्हावी, आणि मुंबई, नागपूरसह ठिकठिकाणी विद्यार्थ्यांवर दाखल करण्यात आलेले सर्व एफआयआर मागे घेऊन दोषी पोलिसांवर कडक कारवाई करावी, अशा प्रमुख मागण्या या वेळी लावून धरण्यात आल्या. शरद पवार आणि सुप्रिया सुळेंसारख्या प्रमुख विरोधी नेत्यांनी या आंदोलनाला दिलेल्या पाठिंब्यामुळे आता हे आंदोलन अधिक आक्रमक व व्यापक वळण घेण्याची शक्यता वर्तवली जात आहे.