गोपीचंद पडळकरांच्या समोरच नितीन देशमुखांना मारहाण झाली, 'तो' Inside Video आला समोर

सुरुवातीला मारहाणीचं वृत्त जेव्हा समोर आलं तेव्हा काही पत्रकारांनी गोपीचंद पडळकर यांना गाठलं आणि घडल्या प्रकाराबाबत विचारणा केली. पण त्यावेळी आपण तिथे नव्हतोच.. असं विधान पडळकरांनी केलं. मात्र, आता नव्याने जो व्हिडिओ समोर आला आहे त्यात गोपीचंद पडळकर यांच्या समोरच नितीन देशमुख यांना मारहाण केल्याचं ठळकपणे समोर आलं आहे.

हे ही वाचा>> विधानभवनाच्या गेटसमोर जितेंद्र आव्हाड आणि गोपीचंद पडळकरांमध्ये शिवीगाळ

नव्या VIDEO मध्ये नेमकं काय?

विधानसभा परिसरातच हाणामारी झाल्याचं वृत्त समोर आल्याने या प्रकरणाचं गांभीर्य वाढलं. त्यानंतर आता या घटनेचे नवनवीन व्हिडिओ देखील समोर येत आहेत. त्यातीलच एक व्हिडिओ समोर आला आहे. ज्यामध्ये स्पष्टपणे दिसत आहेत की, जेव्हा नितीन देशमुख यांना पडळकरांच्या कार्यकर्त्यांनी मारहाण सुरू केली तेव्हा पडळकर हे तिथेच हजर होते.

मारहाणीची सुरुवात झाली कशी?

जितेंद्र आव्हाडांचे कार्यकर्ते नितीन देशमुख हे विधानसभा परिसरात प्रवेश करण्यासाठी विधीमंडळाच्या पायऱ्यांवरून आत जात होते. त्याचवेळी दुसऱ्या दिशेला पायऱ्यांवर भाजप आमदार गोपीचंद पडळकर हे त्यांच्या कार्यकर्त्यांसह उभे होते.

नितीन देशमुख हे पायऱ्यांवरून जात असताना गोपीचंद पडळकर यांच्याकडे रोखून पाहत पुढे जात होते. त्यावेळी पडळकर मात्र अचानक चिडले आणि त्यांनी नितीन देशमुख यांच्याकडे पाहत बोलण्यास सुरुवात केली. यावेळी पडळकरांच्या एका कार्यकर्त्याने त्यांना हाताला खेचून थोडसं मागे आणलं.

हे ही वाचा>> VIDEO: विधानसभेच्या परिसरात तुफान हाणामारी, पडळकर आणि आव्हाडांच्या कार्यकर्त्यांची कपडे फाटेपर्यंत मारामारी!

पण पडळकरांचे इतर 3 ते 4 कार्यकर्ते जोरजोरात बोलत नितीन देशमुखांच्या दिशेने पुढे गेले. यावेळी नितीन देशमुख आणि पडळकरांच्या कार्यकर्त्यांमध्ये शाब्दिक चकमक झाली. तर पुढच्याच क्षणी या कार्यकर्त्यांनी नितीन देशमुखांना तुफान मारहाणीला सुरुवात केली. हे सगळे कार्यकर्ते नितीन देशमुख यांना मारहाण करत आतल्या लॉबीमध्ये घेऊन गेले.

त्यानंतर तेथील सुरक्षा रक्षकांनी तात्काळ हस्तक्षेप करत ही मारहाण सोडवली. पण तोपर्यंत हा सगळा प्रकार कॅमेऱ्यात कैद झाला होता. ज्यानंतर यावरून विरोधकांनी सरकारवर जोरदार टीका सुरू केली.
 

आधी काही माहीत नाही असं म्हणणारे गोपीचंद पडळकरांनी नंतर व्यक्त केली दिलगिरी..

सुरुवातीला आपल्याला याबाबत काहीच माहिती नाही असं म्हणणाऱ्या गोपीचंद पडळकर यांनी काही वेळानंतर घडल्या प्रकाराबाबत दिलगिरी व्यक्त केली. दिलगिरी व्यक्त करण्याआधी त्यांना चंद्रशेखर बावनकुळे यांनी आपल्या दालनात बोलावून घेतलं होतं.

दिलगिरी व्यक्त करताना पडळकर म्हणाले की, ' विधानसभेच्या प्रांगणात जी घटना घडली ती अतिशय दुर्दैवी घटना आहे. याचं अतीव दु:ख विधानसभा सदस्य म्हणून मला आहे. मी विधानसभा अध्यक्ष आणि सभापती हे आवार त्यांच्या अंतर्गत असल्याने दिलगिरी व्यक्त करतो आणि याविषयी आमचे सगळे नेते मंडळी यांच्याशी चर्चा करून तुमच्याशी बोलतो.' अशी प्रतिक्रिया त्यांनी दिली होती.