सगळ्यात मोठी बातमी, 'राष्ट्रपतींनी वोट चोरीचा आरोप फेटाळला नाही, पुरावे...' द्रोपदी मुर्मूच्या भेटीनंतर राहुल गांधींचा दावा
राहुल गांधी यांनी राष्ट्रपती द्रौपदी मुर्मू यांची भेट घेत वोट चोरीच्या कथित आरोपांवर निवेदन सादर केले. मुख्य निवडणूक आयुक्त ज्ञानेश कुमार यांना हटवण्यासाठी हस्तक्षेप करण्याची मागणी करत विरोधकांनी पुरावे सादर करण्याची तयारी दर्शवली.
ADVERTISEMENT
नवी दिल्ली: देशातील निवडणूक प्रक्रियेतील कथित अनियमितता आणि 'वोट चोरी'च्या आरोपांवरून विरोधकांनी आक्रमक भूमिका घेतली आहे. इंडिया आघाडीच्या 10 नेत्यांच्या प्रतिनिधिमंडळाने शुक्रवारी राष्ट्रपती भवनात राष्ट्रपती द्रौपदी मुर्मू यांची भेट घेतली. यावेळी मुख्य निवडणूक आयुक्त (CEC) ज्ञानेश कुमार यांना पदावरून हटवण्यासाठी हस्तक्षेप करण्याची मागणी करण्यात आली. या संदर्भात विरोधकांनी राष्ट्रपतींना निवेदनही सादर केले.
भेटीनंतर लोकसभेतील विरोधी पक्षनेते राहुल गांधी यांनी राष्ट्रपतींनी वोट चोरीच्या आरोपांवर नकार दिला नसल्याचा दावा केला. तसेच, या प्रकरणाचे पुरावे सादर करण्यास सांगितल्याचेही त्यांनी म्हटले. दरम्यान, विरोधक या मुद्द्यावर पुढील कायदेशीर पावले उचलण्याच्या तयारीत आहेत.
राष्ट्रपतींना निवेदन; राहुल गांधींचा काय दावा?
राहुल गांधी यांच्या म्हणण्यानुसार, विरोधी पक्षांच्या प्रतिनिधींनी राष्ट्रपती द्रौपदी मुर्मू यांच्यासमोर मतदार याद्यांमधील कथित त्रुटी आणि निवडणुकांमधील अनियमिततेचा मुद्दा उपस्थित केला. या आरोपांबाबत राष्ट्रपतींनी विरोधकांकडून पुरावे मागितले असून, या प्रकरणाचा विचार करण्याची भूमिका त्यांनी घेतल्याचे राहुल गांधी यांनी सांगितले.
हे ही वाचा>> CJP च्या आंदोलनाची दिल्ली पोलिसांना धडकी, थेट दिल्लीच्या बॉर्डर सील करणं सुरू
राहुल गांधी यांनी पंतप्रधान नरेंद्र मोदी, केंद्रीय गृहमंत्री अमित शाह आणि मुख्य निवडणूक आयुक्त ज्ञानेश कुमार यांच्यावर लोकशाहीविरोधात कट रचल्याचा आरोप केला. विविध राज्यांमधील निवडणुकांमध्ये गडबड झाल्याचा दावा करत विरोधक राष्ट्रपतींकडे संबंधित पुरावे सादर करणार असल्याचे त्यांनी स्पष्ट केले.