एकनाथ शिंदेंसोबतच्या चर्चेनंतरही अब्दुल सत्तार आक्रमक, भाजपवर जोरदार हल्लाबोल
Chhatrapati Sambhajinagar Vidhan Parishad Election : समीर सत्तार यांनी विधान परिषद निवडणुकीतून माघार घेतल्यानंतर अब्दुल सत्तार यांनी भाजपवर पुन्हा एकदा जोरदार टीका केली आहे.
ADVERTISEMENT
Chhatrapati Sambhajinagar Vidhan Parishad Election : छत्रपती संभाजीनगर विधान परिषद निवडणुकीच्या रिंगणातून शिवसेनेचे आमदार अब्दुल सत्तार यांचे चिरंजीव समीर सत्तार यांनी अखेर माघार घेतलीये. ही माघार उपमुख्यमंत्री एकनाथ शिंदे यांच्यासोबत झालेल्या सविस्तर चर्चेनंतर घेण्यात आली आहे. मात्र, या निर्णयाच्या पार्श्वभूमीवर अब्दुल सत्तार यांनी संभाजीनगरला पोहोचताच पुन्हा एकदा भाजपवर जोरदार निशाणा साधला आहे. या राजकीय घडामोडींमुळे महायुतीमधील अंतर्गत मतभेद आणि सत्तारांची आक्रमक भूमिका पुन्हा एकदा चव्हाट्यावर आली आहे.
अब्दुल सत्तारांनी समर्थकांसमोर रोखठोक भूमिका
समीर सत्तार यांच्या माघारीनंतर अब्दुल सत्तार यांनी आपल्या कार्यकर्त्यांसमोर आणि समर्थकांसमोर रोखठोक भूमिका मांडली. यावेळी शिवसेनेचे आमदार रमेश बोरनारे, आमदार संजना जाधव आणि खासदार संदीपान भुमरे हे उपस्थित होते. त्यांच्या उपस्थितीत सत्तार यांनी भाजपवर सडकून टीका केली, ज्यामुळे स्थानिक पातळीवर महायुतीमध्ये सर्व काही आलबेल नसल्याचे स्पष्ट झाले आहे. माघार घेतली असली तरी, सत्तारांनी आपल्या आक्रमक शैलीत भाजपच्या धोरणांना लक्ष्य केल्यामुळे संभाजीनगरच्या राजकारणात नवे वळण मिळाले आहे.
राजकीय गणिते बदलण्याची चिन्हे
विधान परिषद निवडणुकीच्या या राजकीय नाट्यामुळे आता संभाजीनगरमधील आगामी राजकीय गणिते बदलण्याची चिन्हे आहेत. समीर सत्तार यांनी माघार घेतल्याने शिवसेनेच्या भूमिकेकडे सर्वांचे लक्ष लागलेले असतानाच, सत्तारांनी केलेली टीका भाजपच्या नेत्यांना कशी जिव्हारी लागते, हे पाहणे महत्त्वाचे ठरणार आहे. सत्तारांच्या या रोखठोक विधानांमुळे महायुतीतील नेत्यांमध्ये समन्वय राखण्याचे आव्हान आता नेतृत्वापुढे उभे राहिले आहे.
