Ind vs Pak : 36 धावांत झाला ‘गेम’! 31 वर्षांनंतरही पाकचं ‘ते’ स्वप्न अधुरेच

अहमदाबादच्या नरेंद्र मोदी स्टेडियमवर सुमारे 90 हजार क्रिकेट प्रेमींच्या उपस्थितीत जसप्रीत बुमराह, मोहम्मद सिराज, कुलदीप यादव, रवींद्र जडेजा आणि हार्दिक पांड्या या पाच भारतीय गोलंदाज (प्रत्येकी दोन बळी) पाकिस्तानवर तुटून पडले. त्यामुळे पाकिस्तान संघाच्या 8 विकेट अवघ्या 36 धावांतच गेल्या. पाकिस्तानचा अवघा संघ 191 धावांत ऑलआऊट झाला.

दुसरीकडे टीम इंडियाचा कर्णधार रोहित शर्माने दिल्लीत शतक झळकावल्यानंतर अहमदाबादमध्येही तुफानी शैलीतील खेळी कायम ठेवली. रोहितने फटकेबाजी करत पाकिस्तानच्या गोलंदाजांची धुलाईच केली. रोहितने 86 धावांच्या खेळीत 6 षटकार ठोकले. त्यामुळे भारताने 30.3 षटकांत 3 गडी गमावून 192 धावांचे लक्ष्य गाठले आणि पाकिस्तानचा सहज पराभव केला. विश्वचषक स्पर्धेत भारताला पराभूत करण्याचे स्वप्न पाकिस्तानचे पुन्हा एकदा अधुरेच राहिले. 1992 पासून विश्वचषकात पाकिस्तानला पराभूत करण्याची परंपरा टीम इंडियाने कायम ठेवत हा विक्रम 8-0 असा वाढवला.

हेही वाचा >> Ind vs Pak : बुमराह-कुलदीपने 12 चेंडूतच मोडलं पाकिस्तानचं कंबरडे! पाहा VIDEO

192 धावांच्या लक्ष्याचा पाठलाग करण्यासाठी शुभमन गिल रोहित शर्मासह सलामीला आला. गिलने सुरुवातीच्या क्षणांमध्ये उत्कृष्ट चौकार मारले, पण तो खेळपट्टीवर जास्त काळ टिकू शकला नाही. डावाच्या तिसऱ्या षटकात शाहीनच्या चेंडूवर गिलने पॉईंटच्या दिशेने जोरदार फटका मारला. मात्र शादाब खानने उत्कृष्ट झेल घेतला. त्यामुळे गिलला विश्वचषकातील पहिल्याच सामन्यात 11 चेंडूत चार चौकारांसह केवळ 16 धावा करता आल्या.