Tokyo Olympic 2020 : भारताची पदकाची आशा संपुष्टात, दिपीका कुमारीची निराशाजनक कामगिरी

रशियाच्या खेळाडूवर मात करुन उपांत्यपूर्व फेरीत दाखल झालेल्या दिपीका कुमारीमुळे भारतीयांना या खेळात पदकाची आशा होती. परंतू कोरियन खेळाडूने दिपीका कुमारीला संधीच दिली नाही. पहिल्या सेटमध्ये सात गुण घेत दिपीकाची सुरुवातच निराशाजनक झाली. यानंतरच्या दोन प्रयत्नांमध्ये दिपीकाने दोन १०-१० गुण मिळवत कमबॅक केलं. परंतू दुसरीकडे अॅन सानने तिन्ही संधींमध्ये १०-१० गुणांची कमाई करत पहिला सेट खिशात घातला.

संपूर्ण सामन्यात दिपीका कुमारी दडपणाखाली खेळताना जाणवत होती. याआधीही अॅन सानने दिपीकाला हरवलं होतं. दुसऱ्या सेटच्या पहिल्या प्रयत्नात दिपीकाने १० गुणांची कमाई करत चांगली सुरुवात केली. कोरियाच्या सानने ९ गुण मिळवल्यामुळे दिपीकाकडे एका गुणाची आघाडी होती. परंतू नंतरच्या दोन संधींमध्ये ७-७ अशी निराशाजनक कामगिरी करत दिपीकाने सेट गमावला.

Tokyo Olympic Explainer : तिरंदाजीत दक्षिण कोरिया कसं गाजवतं एकहाती सत्ता? काय आहे त्यांच्या यशामागचं रहस्य?