मुंबईची खबर: आता ‘या’ मार्गावरील प्रवास अधिक सोयीस्कर… नव्या फ्लायओव्हरमुळे वाहतूक कोंडीपासून प्रवाशांना दिलासा

शनिवारी (15 नोव्हेंबर) बीएमसीने उड्डाणपुलाच्या बांधकामासाठी निविदा काढल्या. गेल्या दोन वर्षांत बीएमसीला प्रोजेक्टच्या बांधकामात बरेच अडथळे आले आणि आता उड्डाणपुलाच्या बांधकामाचा खर्चही वाढला आहे. बीएमसी पूल विभागाच्या एका अधिकाऱ्याने या प्रोजेक्टबाबत माहिती देताना सांगितलं की, या उड्डाणपुलामुळे कुर्ला ते घाटकोपर या एलबीएस रोडवरील वाहतूक कोंडीतून वाहनचालकांना सुटका मिळेल.

प्रोजेक्टमध्ये अडथळे  

कुर्ल्यातील कल्पना टॉकीज ते घाटकोपर-अंधेरी मार्गावर मोठ्या प्रमाणात वाहतूक कोंडी पाहायला मिळते. या समस्येवर उपाय म्हणून, बीएमसीने दोन वर्षांपूर्वी कुर्ल्यातील कल्पना टॉकीज ते घाटकोपर (पश्चिम) येथील पंख शाह दर्ग्यापर्यंत साडेचार किलोमीटर लांबीचा उड्डाणपूल बांधण्याचा निर्णय घेतला. खरं तर, या जमिनीजवळ पूल बांधण्यास नौदलाने आक्षेप घेतला, कारण या पुलाला लागून असलेली एक किलोमीटर जमीन नौदलाकडे आहे.

उड्डाणपुलाचं काम करण्यासाठी नौदलाकडून ना हरकत प्रमाणपत्र (एनओसी) आवश्यक होतं. बीएमसीच्या एका अधिकाऱ्याने याबाबत सांगितलं की, गेल्या दोन वर्षांत एनओसीबाबत बऱ्याचदा पत्रव्यवहार करण्यात आला होता, परंतु बीएमसीला कोणताही प्रतिसाद मिळाला नाही. यामुळे, बीएमसीने पुलाच्या पुढील कामासाठी लागणाऱ्या खर्चाचा अंदाज आणि निविदा प्रक्रिया थांबवल्या. नुकतंच, बीएमसीला नौदलाकडून एनओसी मिळाला आणि म्हणून त्यांनी व्हीजेटीआयमार्फत पुलाच्या बांधकामासाठी सर्वेक्षण सुरू केलं.

हे ही वाचा: पुण्याची गोष्ट: 'इंद्रायणीचं पाणी पिण्यासह, स्वयंपाकासाठी...', जिल्हाधिकाऱ्यांचा महत्त्वाचा आदेश

आगामी बीएमसी निवडणुका लक्षात घेता बीएमसी प्रशासनाने टेंडरची प्रक्रिया वेगवान केली आहे आणि निविदा जारी केल्या आहेत. पूलाच्या बांधकामासाठी निविदा सादर करण्याची अंतिम तारीख 6 डिसेंबर असल्याची माहिती आहे. डिसेंबरच्या पहिल्या आठवड्यात पूल बांधकामासाठी कंत्राटदाराची निवड केली जाईल.

हे ही वाचा: Govt Job: गुप्तचर विभागात सहभागी होण्याची सुवर्णसंधी! कोणतीही परीक्षा नाही अन्...

‘या’ कारणासाठी फ्लायओव्हर उभारणार 

खरं तर, कुर्ला एलबीएस ते घाटकोपर-अंधेरी हा मार्ग खूप वर्दळीचा आहे, त्यामुळे हा उड्डाणपुल घाटकोपर-अंधेरी लिंक रोडशी जोडल्याने वाहतूक कोंडी कमी होईल. हा पूल नौदलाच्या जमिनीला लागून असल्याकारणाने वाहनचालकांना नौदलाच्या हालचाली पाहता येऊ नयेत, यासाठी सहा मीटरपेक्षा जास्त उंचीचे हाय क्वालिटी साउंड बॅरिअर बसवले जातील. वर्क ऑर्डर जारी झाल्यानंतर, पूल चार वर्षांत पूर्ण होणार असल्याचं सांगितलं जात आहे. हा पूल साडेचार किलोमीटर लांब आणि 15.50 मीटर रुंद असल्याची माहिती आहे.