चिखलदरा : दरीत चाललेली ट्रॅव्हरल अडवताना चालक चिरडला गेला, पण एका झाडामुळे 20 प्रवाशांचा जीव वाचला

या अपघातात मृत्युमुखी पडलेल्या चालकाचे नाव सुमित वनकर (वय 34, रा. चंद्रपूर) असे आहे. विदर्भाचे नंदनवन म्हणून ओळखल्या जाणाऱ्या चिखलदरा पर्यटनस्थळी चंद्रपूर येथून डीडी 03 टी 9048 क्रमांकाच्या ट्रॅव्हलरने महिला व पुरुष पर्यटक आले होते. रविवारी दुपारी परतीचा प्रवास सुरू असताना घाटातील वळणावर एका महिलेला अचानक मळमळ झाली आणि ओकारी येऊ लागल्याने चालकाने चिखलदरा–परतवाडा मार्गावरील आडनदी परिसरात वाहन थांबवले.

हेही वाचा : सातारा ड्रग्स प्रकरण: शिंदेच्या शिवसेनेतील 'त्या' नेत्यावर काँग्रेसकडून संशय, खळबळ उडवून देणारं नेमकं प्रकरण काय?

थांबविल्यानंतर काही क्षणातच उताराच्या दिशेने वाहन हळूहळू पुढे सरकत असल्याचे सुमीतच्या लक्षात आले. तत्काळ धोका ओळखून त्याने धावत जाऊन वाहन थांबविण्याचा प्रयत्न केला. मात्र, या झटापटीत त्याचा पाय चाकाखाली आल्याने तो गंभीररीत्या जखमी झाला आणि जागीच कोसळला. त्याच वेळी ट्रॅव्हलर दरीकडे झेपावत दोन झाडांच्या मधून जात तिसऱ्या झाडाला अडकली. त्यामुळे मोठा अनर्थ टळला आणि वाहनातील सर्व प्रवासी सुरक्षित बाहेर पडले.

घटनेची माहिती मिळताच चिखलदरा पोलीस ठाण्याचे उपनिरीक्षक सुरेश राठोड, सुरेश दहीकर, हर्षल काळे यांच्यासह पोलीस पथक घटनास्थळी दाखल झाले. पंचनामा करून मृतदेह अचलपूर येथील उपजिल्हा रुग्णालयात शवविच्छेदनासाठी पाठविण्यात आला. ठाणेदार प्रशांत मसराम यांनीही घटनास्थळाची पाहणी केली.

या घटनेमुळे परिसरात हळहळ व्यक्त केली जात असून, चालक सुमीत वनकर यांनी अखेरपर्यंत प्रयत्न करत प्रवाशांचा जीव वाचविल्याने त्यांचा त्याग अनेकांच्या डोळ्यांत पाणी आणणारा ठरला आहे.

इतर महत्त्वाच्या बातम्या 

दोन वर्षीय चिमुरडीवर बलात्कार करणाऱ्या जालन्यातील आरोपीला फाशीच, राष्ट्रपतींनी दयेची याचिका फेटाळली