Indurikar: ‘सम-विषम तारखेला लैंगिक संबध..’, हायकोर्टाचा इंदुरीकरांना मोठा दणका

Indurikar Maharaj: इशरार चिश्ती, छत्रपती संभाजीनगर: महाराष्ट्रातील प्रसिद्ध किर्तनकार ह.भ.प इंदुरीकर महाराज (Indurikar Maharaj) यांनी कीर्तनातून लिंगभेदाबाबत केलेल्या वक्तव्यामुळे वाद निर्माण झाला होता. त्या वादानंतर इंदुरीकर महाराज यांच्याविरोधात पोलिसात तक्रारीही दाखल झाल्या होत्या. आता या प्रकरणी इंदुरीकर महाराजांच्या अडचणीत वाढ होण्याची शक्यता आहे. कारण उच्च न्यायालयाने (High Court) इंदुरीकर महाराजांविरोधात गुन्हा दाखल करा असे स्पष्ट आदेश दिले आहेत. (controversial statement indurikar maharaj gender discrimination married couple sexual relations high court has ordered to file a case)

सम-विषम तारखेला शरीरसंबंध ठेवल्यास मुलगा-मुलगी होते असं विधान इंदुरीकर महाराजांनी केलं होतं. त्यांच्या या विधानानंतर पोलिसात तक्रार दाखल करण्यात आली होती. तसंच सत्र न्यायालयात गुन्हा दाखल करण्याचे आदेश दिले होते. पण सत्र न्यायालयाने गुन्हा रद्द केला होता. सत्र न्यायालयाच्या या निर्णयाला उच्च न्यायालयात आव्हान देण्यात आलं होतं. यावर हायकोर्टात सुनावणी झाली. आता हायकोर्टाने इंदुरीकर महारांजांविरोधात गुन्हा दाखल करा असं म्हटलं आहे.

हे ही वाचा >> Gautami patil: अहो इंदुरीकर, तुमचा ब्लॅकचा पैसा…; तृप्ती देसाईंनी भडकल्या

इंदुरीकर महाराजांना जिल्हा सत्र न्यायालायने दिलासा देताना त्यांच्यावरील गुन्हा रद्द ठरवला होता. पण या निर्णयाविरोधात अंधश्रद्धा निर्मूलन आणि राज्य सरकारकडून औरंगाबाद खंडपीठात याचिका दाखल करण्यात आली होती. इंदुरीकर महाराजांनी त्यांच्या किर्तनात लिंगभेदाबाबत केलेल्या वक्तव्याने वाद निर्माण झाला होता. यावर अंधश्रद्धा निर्मूलन समिती आणि जिल्हा शल्य चिकित्सकांनी तक्रार दाखल केली होती.

इंदुरीकरांचं वादग्रस्त वक्तव्य

इंदुरीकर यांनी अहमदनगर जिल्ह्यातील एका कीर्तनाच्या कार्यक्रमात सांगितलं होतं की, सम क्रमांकाच्या तारखांना (2, 4, 6, 8…) संभोग केल्याने मुलगा होतो. तर विषम क्रमांकाच्या तारखेला (1, 3, 5,7,9…) लैंगिक संबंध ठेवल्यास त्या दाम्पत्याला मुलगी होते.

स्त्रीसंग सम तिथीला झाला तर मुलगा होतो, विषम तिथीला झाला तर मुलगी होते. स्त्रीसंग अशीव वेळेला झाला तर होणारं अपत्य खानदान मातीत मिळवणारं होतं. टायमिंग महत्त्वाचं आहे.. टायमिंग हुकलं की क्वालिटी खराब. पुलश्य नावाच्या ऋषीने केकसी नावाच्या स्त्रीशी सूर्यास्ताच्या वेळी संग केला तर रावण, कुंभकर्ण आणि बिभीषण जन्माला आले.

हे ही वाचा >> इंदुरीकर महाराज पुन्हा वादाच्या भोवऱ्यात; “त्यांचं वाटोळ होणार, मुलं…” पाहा व्हिडीओ

त्यांनी केलेल्या याच विधानाने इंदुरीकरांवर प्रचंड टीका करण्यात आली होती. तसंच त्यांच्याविरोधात राज्यभरात अनेक ठिकाणी गुन्हे दाखल करण्यात आले होते. ज्यानंतर त्यांनी आपल्या वक्तव्याबाबत माफी देखील मागितली होती.

इंदुरीकरांचा माफीनामा..

इंदुरीकर महाराज यांनी आपल्या माफीनाम्यात असं म्हटलं होतं की, ‘त्यांच्या वक्तव्यामुळे कोणाच्याही भावना दुखावल्या गेल्या असतील तर मी त्याबद्दल दिलगिरी व्यक्त करतो. गेल्या 26 वर्षात कीर्तन करताना मी अंधश्रद्धा आणि इतर सामाजिक वाईट गोष्टींशी लढण्यावर भर दिला आहे. माझ्या वक्तव्यामुळे कोणाच्या भावना दुखावल्या गेल्या असतील तर मी त्याबद्दल माफी मागतो.’ असं ते म्हणाले होते.

मात्र, असं असलं तरीही आता थेट उच्च न्यायालयानेच या प्रकरणी गुन्हा दाखल करण्याचे आदेश दिल्याने इंदुरीकरांच्या अडचणीत मोठी भर पडली आहे.