Pooja Khedkar : पुण्याच्या जिल्हाधिकाऱ्यांविरोधात पूजा खेडकरांची पोलिसांत तक्रार, आरोप काय?

पूजा खेडकर यांनी पुण्याचे जिल्हाधिकारी सुहास दिवसे यांच्याविरोधात वाशिम येथे पोलिसांना तक्रार दिली असून, त्यांच्यावर कारवाई करण्याची मागणी केली आहे. पुण्यामध्ये प्रशिक्षण घेत असतानाच्या काळात जिल्हाधिकाऱ्यांनी छळ केल्याचा आरोप पूजा खेडकर यांनी केला आहे. 

पूजा खेडकर यांनी कधी दिली तक्रार?

मिळालेल्या माहितीनुसार, पूजा खेडकर यांनी वाशिमच्या जिल्हाधिकारी बुवनेश्वरी एस. यांची परवानगी घेऊन पोलिसांकडे तक्रार केली आहे.

हेही वाचा >> 'त्या' सर्टिफिकेटमुळे IAS पूजा खेडकरची जाणार नोकरी? UPSC मधील नियम काय? 

सोमवारी (१५ जुलै) वाशिम पोलिसांचे एक पथक पूजा खेडकर यांच्या निवासस्थानी गेले होते. महिला पोलीस अधिकाऱ्यांच्या या पथकामध्ये एक सहाय्यक पोलीस आयुक्त होत्या. रात्री साडेदहा वाजता पूजा खेडकरांच्या घरी गेलेले हे पथक मध्यरात्री एक वाजता बाहेर पडले होते.

हेही वाचा >> वादग्रस्त कारकीर्द, 40 कोटींची संपत्ती... IAS पूजा खेडकरांचे वडील आहेत तरी कोण? 

मिळालेल्या माहितीनुसार पूजा खेडकर यांनी पुण्याचे जिल्हाधिकारी सुहास दिवसे यांनी मानसिक छळ केल्याची तक्रार केली आहे. त्यांच्याविरोधात कारवाई करण्याची मागणी पूजा खेडकरांनी केली आहे. 

पूजा खेडकरांना तत्काळ हजर होण्याचे निर्देश

पुण्याचे जिल्हाधिकारी सुहास दिवसे यांनी पूजा खेडकरांच्या वर्तणुकीची तक्रार सचिवांकडे केली होती. त्यानंतर या प्रकरणाची माहिती मसुरी येथील लाल बहादूर शास्त्री राष्ट्रीय अकादमी प्रशासनाला देण्यात आली. त्यानंतर भारतीय प्रशासकीय सेवेतील अधिकाऱ्यांना प्रशिक्षण देणाऱ्या या अकादमीने पूजा खेडकरांचा प्रशिक्षण कार्यक्रम स्थगित केला असून, तत्काळ तातडीने हजर होण्यास सांगितले आहे.