कल्याण : रॅपिडो बुक केली पण त्याने तरुणीला अंधाऱ्या ठिकाणी नेलं, अंतिप्रसंगाचा प्रयत्न, नागरिकांकडून चोप VIDEO

मिळालेल्या माहितीनुसार, सदर तरुणी सायंकाळच्या सुमारास जिमसाठी घराबाहेर पडली होती. तिने नेहमीप्रमाणे रॅपिडो अ‍ॅपद्वारे दुचाकी बुक केली. सुरुवातीला प्रवास सुरळीत सुरू होता. मात्र काही अंतर गेल्यानंतर चालकाने अचानक मार्ग बदलत जीमकडे न जाता कल्याण पश्चिमेतील पोलीस लाईन परिसरातील एका निर्जन आणि अंधाऱ्या ठिकाणी मोटारसायकल नेली. परिस्थिती संशयास्पद वाटताच तरुणीने चालकाला प्रश्न विचारले असता, त्याने उडवाउडवीची उत्तरे देत तिची छेडछाड सुरू केल्याचा आरोप आहे.

याच दरम्यान चालकाने तरुणीवर अतिप्रसंग करण्याचा प्रयत्न केल्याचे सांगितले जात आहे. प्रसंगाचे गांभीर्य ओळखून तरुणीने घाबरून न जाता धैर्याने प्रतिकार केला. तिने स्वतःचा बचाव करत जोरात आरडाओरडा केला. तिचा आवाज ऐकून आसपासच्या परिसरातील नागरिक घटनास्थळी धावून आले. नागरिकांनी तरुणीकडून घडलेला प्रकार समजून घेताच संबंधित चालकाला ताब्यात घेतले. संतप्त जमावाने चालकाला चांगलाच चोप दिला.

घटनेची माहिती मिळताच कल्याण पोलिसांनी तातडीने घटनास्थळी दाखल होत परिस्थिती नियंत्रणात आणली. पोलिसांनी जमावाकडून चालकाला ताब्यात घेत पुढील कारवाईसाठी पोलीस ठाण्यात नेले. पीडित तरुणीच्या तक्रारीवरून आरोपी चालकाविरोधात संबंधित कलमांखाली गुन्हा दाखल करण्यात आला असून, प्रकरणाचा पुढील तपास सुरू आहे.

या घटनेमुळे संपूर्ण परिसरात भीतीचे वातावरण पसरले आहे. विशेषतः ऑनलाईन दुचाकी व टॅक्सी सेवांमधून प्रवास करणाऱ्या महिलांच्या सुरक्षिततेबाबत गंभीर प्रश्न उपस्थित होत आहेत. नागरिकांकडून अशा सेवांवर कठोर नियंत्रण ठेवण्याची, चालकांची पार्श्वभूमी तपासणी अधिक कडक करण्याची मागणी केली जात आहे.

दरम्यान, वेळेवर नागरिकांनी हस्तक्षेप केल्याने मोठा अनर्थ टळला. मात्र, अशा घटना पुन्हा घडू नयेत यासाठी प्रशासन, सेवा पुरवठादार कंपन्या आणि समाजाने एकत्रितपणे जबाबदारी घेण्याची गरज व्यक्त केली जात आहे. महिलांच्या सुरक्षिततेसाठी प्रभावी उपाययोजना राबवण्याची मागणी आता जोर धरू लागली आहे.

इतर महत्त्वाच्या बातम्या 

अमोल मिटकरींची बदनामी केल्याप्रकरणी 4 युट्यूब पत्रकारांना 5 दिवसांचा तुरुंगवास; हक्कभंग प्रस्तावाचा इम्पॅक्ट