Maratha Reservation : आरक्षणासाठी कराव्या लागतील ‘या’ गोष्टी, भोसले समिती अहवालात काय?

Manoj Jarange Maratha Reservation : राज्यात मराठा आरक्षणाचा मुद्दा चिघळला आहे. सरकारकडून सातत्याने मराठा समाजाला टिकणारं आरक्षण देण्याचे आश्वासन दिलं जात आहे. पण, मराठा समाजाला टिकणार आरक्षण द्यायचं असेल, तर काय करावं लागेल, याबद्दल याआधीच एका समितीने काही शिफारशी केलेल्या आहेत.

उद्धव ठाकरेंच्या नेतृत्वाखाली मविआ सरकार असताना सर्वोच्च न्यायालयाने मराठा आरक्षण रद्द केलं. त्यानंतर सरकारने निवृत्त मुख्य न्यायमूर्ती दिलीप भोसले यांच्या अध्यक्षतेखाली समिती नेमली होती. या समितीने मराठा आरक्षणासाठी सरकारने काय करायला हवे, याबद्दल काही शिफारशी केल्या आहेत.

मराठा आरक्षण देण्यासाठी समितीने काय केलेल्या आहेत शिफारशी?

1) राज्य सरकारच्या वकिलांनी शक्य आहे ती सगळी बाजू सुप्रीम कोर्टाकडे मांडली आहे. पण, निवडक कागदपत्रांचा विचार हा सुप्रीम कोर्टाने निकाल देताना केला आहे.

2) राज्य सरकारने या निकालाबाबत तात्काळ पुर्नविचार याचिका दाखल करावी. मराठा आरक्षणाच्याबाबतीत अशा अनेक बाबी आहेत ज्याकडे लक्ष वेधलं गेलेलं नाही त्याकडे पुनर्विचार याचिकेतून सरकारने सुप्रीम कोर्टाचं लक्ष वेधावं.

3) ज्या राज्यांना 50 टक्क्यांच्या वर आरक्षण दिलं आहे. त्यांच्यासह राज्य सरकारने केंद्र सरकारकडे जाऊन कलम 15 (4) आणि 16 (4) मध्ये घटनात्मक दुरुस्तीबाबत प्रयत्न करावेत.

हे ही वाचा >> बीडमध्ये शरद पवार गटाच्या पक्षाचं कार्यालय जाळलं! आंदोलन हिंसक वळणावर

4) पुनर्विचार याचिका न्यायाधीशांच्या चेंबरमध्ये दाखल न करता ती ओपन कोर्टामध्ये दाखल केली जावी जेणेकरुन त्यावर प्रतिवाद करता येईल. पण पुनर्विचार याचिका रद्द झाली तर मराठा समाजाला आरक्षण देण्यासाठी गायकवाड समितीचा अहवाल पुरेसा नाही. त्यामुळे पुन्हा नव्याने मागास वर्गीय आयोग स्थापन करण्यात यावा.

5) मराठा समाजाच्या शैक्षणिक मागसलेपणाचा विचार करताना सद्य परिस्थिती पुन्हा तपासावी.

6) जो उच्चभ्रू असा मराठा समाज आहे, त्यामधील राजकारणी, व्यावसायिक यांच्या प्रमाणात सामाजिक आणि आर्थिकदृष्ट्या किती प्रमाणात मराठा समाज मागास आहे, याची टक्केवारी शोधण्यात यावी.

7) प्रशासकीय सेवेतील मराठा समाजातील नेमकी आकडेवारी किती आहे आणि इतर प्रवर्गातील या सेवेतल्या टक्केवारीचा तुलनात्मक अभ्यास करण्यात यावा.

8) याआधी मराठा समाजाच्या मागास आयोगांचा अभ्यास करणं आणि त्यामधील त्रुटी काय आहेत याचा अभ्यास करणं आवश्यक आहे.

9) खुल्या प्रवर्गाच्या तुलनेत मराठा समाजाला किती प्रतिनिधित्व मिळालं आहे याचं प्रमाण तपासले जावे.

10) मराठा समाजाचं आर्थिक, शैक्षणिक आणि सामाजिक मागसलेपण सिद्ध करायचं असेल, तर त्यासाठी मागासवर्गीय आयोगाच्या मार्फत पुन्हा या संबंधीचा महत्त्वाचा डेटा गोळा केला जावा.

समजून घ्या >> Maratha Reservation देणे खरंच शक्य आहे का?

11) मराठा समाजाला सरकारी नोकऱ्या आणि शैक्षणिक प्रवेशांमध्ये पुरेशा प्रमाणात प्रतिनिधित्व मिळत नाही हे ठोस आकडेवारीतून दाखवणं गरजेचं आहे.

12) मराठा समाज मागास ठरला तरी उपलब्ध असलेल्या 52 टक्के आरक्षणामध्ये समावून न घेता त्यांच्यासाठी स्वतंत्र आरक्षण देण्यासाठी असामान्य परिस्थिती आहे का हे दाखविण्याची आवश्यकता आहे.