प्रियकरासोबत निघून गेलेली महिला दोन महिन्यांनी घरी परतली अन् भयंकर घडलं!

 सुमारे अडीच महिन्यांपासून पतीच्या घरापासून दूर होती

पोलिसांच्या माहितीनुसार, साधना सुमारे अडीच महिन्यांपासून पतीच्या घरापासून दूर होती. ती गुरुवारी अचानक पतीच्या घरी परतली. तिच्या परतण्यामुळे दोघांमध्ये वाद झाला आणि त्यानंतर मारहाणीची घटना घडली. घटनेची माहिती मिळताच पोलिस घटनास्थळी पोहोचले आणि दोन्ही बाजूंना पोलीस ठाण्यात आणले. साधनाला उपचारासाठी आधी सॅंडी येथील सामुदायिक आरोग्य केंद्रात दाखल करण्यात आले. त्यानंतर पुढील उपचारासाठी तिला हरदोई मेडिकल कॉलेजमध्ये पाठवण्यात आले. साधनाने पोलिसांसमोर पतीवर नाक चावून तोडल्याचा आरोप केला आहे. या घटनेनंतर दीपकला पोलिसांनी ताब्यात घेतले असून प्रकरणातील विविध बाबींची चौकशी केली जात आहे.

पोलिसांनी दिलेल्या माहितीनुसार, साधना अडीच महिन्यांपूर्वी पतीला सोडून तिच्या प्रियकरासोबत गेल्याचा आरोप आहे. ती शेजाऱ्याच्या घराच्या छतावरून उडी मारून पतीच्या घरात परतल्याचेही पोलिसांनी सांगितले आहे. दरम्यान, दीपकच्या कुटुंबीयांनी साधनावरही गंभीर आरोप केले आहेत. दीपकच्या आईने दिलेल्या माहितीनुसार, साधना स्थानिक तरुणासोबत गेली होती. हा तरुण दीपकचा मित्र असल्याचा तिचा दावा आहे. या प्रकरणाची यापूर्वी पोलिसांकडे माहिती देण्यात आली होती आणि त्यावेळी दोन्ही बाजूंमध्ये तडजोड झाली होती, असेही दीपकच्या आईने सांगितले. साधना अचानक घरी परतल्यानंतर तिने मुलांना सोबत घेऊन जाण्याचा प्रयत्न केल्याने वाद झाल्याचा आरोप दीपकच्या आईने केला आहे. या वादात साधनाने दीपकच्या गुप्तांगाला चावा घेतल्याचा आरोपही तिने केला. तसेच साधनाने जमिनीवर डोके आपटून स्वतःला दुखापत करून घेतल्याचेही तिचे म्हणणे आहे.

घटनेनंतर दोन्ही बाजूंकडून एकमेकांवर आरोप

साधना आणि दीपक यांचा विवाह सुमारे दहा वर्षांपूर्वी झाला असून त्यांना आठ, सहा आणि तीन वर्षांच्या तीन मुली आहेत. या घटनेनंतर दोन्ही बाजूंकडून एकमेकांवर आरोप करण्यात आले आहेत. साधनाने पतीविरोधात नाक चावून तोडल्याचा आरोप केला असला तरी तिच्याकडून अद्याप कोणतीही औपचारिक तक्रार दाखल झालेली नसल्याचे पोलिसांनी सांगितले. दुसरीकडे, दीपकच्या आईने पोलिसांकडे तक्रार दाखल केली आहे. पोलिसांनी दोन्ही बाजूंच्या आरोपांची नोंद घेतली असून या प्रकरणातील सर्व बाबींचा तपास सुरू असल्याचे सांगितले आहे. साधनाच्या उपचारानंतर तिच्या आरोपांबाबत आणि दीपकच्या कुटुंबीयांनी केलेल्या आरोपांबाबतही पोलिसांकडून चौकशी केली जात आहे. या प्रकरणात नेमकी घटना कशा प्रकारे घडली, याचा तपास पोलिसांकडून करण्यात येत आहे.