नेमकी घटना काय?

मिळालेल्या माहितीनुसार, ही घटना ऊपरकोट कोतवाली परिसरातील तुर्कमान गेट भागात सोमवारी घडली. फरमान आणि नाझरीन हे दोघेही एका बंद खोलीत आगीच्या विळख्यात सापडलेले आढळले. आगीच्या ज्वाळा आणि आरडाओरडा ऐकून स्थानिक नागरिक घटनास्थळी धावले. त्यांनी तात्काळ पोलिसांना पाचारण केले. पोलिसांनी दोघांनाही तातडीने जिल्हा रुग्णालयात दाखल केले, मात्र फरमानचा उपचारादरम्यान दुर्दैवी मृत्यू झाला.

पूर्ववैमनस्य की प्रेमप्रकरण?

या प्रकरणाला प्रेमप्रकरणाची पार्श्वभूमी असल्याचे बोलले जात आहे. फरमान हा नाझरीनचा पती वसीम याच्या कारखान्यात काम करायचा. मात्र, दोन वर्षांपूर्वी वसीमने काही कारणास्तव फरमानला कामावरून काढून टाकले होते. तेव्हापासून त्यांच्यात वाद असल्याचे समजते.

कुटुंबीयांचे गंभीर आरोप

नाझरीनचा दीर नदीम याने दिलेल्या माहितीनुसार, सोमवारी पहाटे 4 च्या सुमारास कुटुंबातील सर्व पुरुष सदस्य नमाज पठणासाठी मशिदीत गेले होते. नाझरीन घरात एकटीच होती. याच संधीचा फायदा घेऊन फरमान घरात शिरला आणि त्याने आग लावली, असा आरोप नातेवाइकांनी केला आहे. या आगीत नाझरीन 50 टक्क्यांहून अधिक भाजली असून तिची प्रकृती चिंताजनक आहे. प्राथमिक उपचारानंतर तिला दिल्लीतील सफदरजंग रुग्णालयात 'हायर सेंटर'मध्ये रेफर करण्यात आले आहे.

पोलिस आणि फॉरेन्सिक टीमकडून तपास सुरू

घटनेची माहिती मिळताच पोलिसांनी घटनास्थळाची नाकाबंदी केली असून फॉरेन्सिक टीमला पाचारण केले आहे. घटनास्थळावरून काही नमुने गोळा करण्यात आले आहेत. या प्रकरणाबाबत क्षेत्राधिकारी मयंक पाठक यांनी सांगितले की, "आम्हाला 23 फेब्रुवारी 2026 रोजी संध्याकाळी 7 च्या सुमारास या घटनेची माहिती मिळाली. प्राथमिक तपासात त्या खोलीत तिसऱ्या व्यक्तीचा वावर असल्याचे कोणतेही पुरावे मिळालेले नाहीत. ही आत्महत्या आहे, अपघात आहे की एखादा मोठा कट, यादृष्टीने सर्व बाजूंनी तपास सुरू आहे."

परिसरात तणावाचे वातावरण

या घटनेमुळे तुर्कमान गेट परिसरात दहशतीचे आणि तणावाचे वातावरण निर्माण झाले आहे. कोणत्याही प्रकारची कायदा व सुव्यवस्थेची स्थिती बिघडू नये, यासाठी प्रशासनाकडून परिसरात अतिरिक्त पोलीस बंदोबस्त तैनात करण्यात आला आहे.

पुढील पावले

मृत फरमानचा मृतदेह शवविच्छेदनासाठी पाठवण्यात आला आहे. नाझरीन शुद्धीवर आल्यानंतर तिचा जबाब नोंदवण्यात येईल, ज्यामुळे घटनेचा खरा उलगडा होऊ शकेल. पोलीस कॉल डिटेल्स आणि स्थानिक सीसीटीव्ही फुटेजची तपासणी करत आहेत. 

इतर महत्त्वाच्या बातम्या 

मुंबईची खबर: मेट्रो 12A प्रोजेक्टला मंजुरी; कल्याण-शिळफाटा मार्गे नवी मुंबईशी थेट कनेक्टिव्हिटी, प्रवाशांना फायदा