निवृत्त शिक्षकाला अर्ध्या कोटीला फसवलं...पैशांचा पाऊस आणि दुप्पट परताव्याच्या नादात कसा गंडा घातला?

कशी झाली फसवणूक?

बुलढाणा जिल्ह्यातील चिखली येथील निवृत्त शिक्षक रामेश्वर उबाळे यांची जालना बसस्थानकावर एका व्यक्तीशी ओळख झाली. या व्यक्तीने पैशाचे दुप्पट करण्याचे आमिष दाखवून उबाळे यांना जालना येथील रतन आसाराम लांडगे याच्या घरी नेलं. रतन लांडगे आणि त्याच्या साथीदाराने उबाळे यांना विश्वासात घेण्यासाठी पूजा-पाठ आणि जादू-टोण्याचा खोटा ड्रामा रचला.

हे ही वाचा >> "आई मी विष पिलंय, माझा मृतदेह 'इथून' घेऊन जा...", पुण्यात युवकानं स्वत:ला संपवलं, थरकाप उडवणारा घटनाक्रम

यावेळी त्यांनी पैशाचा पाऊस पाडण्याचा दिखावा केला आणि उबाळे यांच्याकडून 46 लाख रुपये घेतले. त्यानंतर, पूजेमध्ये अडथळा येत असल्याचं खोटं कारण सांगून पूजा बंद करण्यात आली. उबाळे यांना आपली फसवणूक झाल्याचं लक्षात आल्यानंतर त्यांनी पैसे परत मागितले, पण रतन लांडगे आणि त्याच्या साथीदाराने पैसे परत करण्यास नकार दिला.

आधीच एकाला फसवल्याप्रकरणी पोलिसांच्या ताब्यात आरोपी

दरम्यान, या प्रकरणी रामेश्वर उबाळे यांनी सदर बाजार पोलिस ठाण्यात तक्रार दाखल केली. पोलिसांनी रतन लांडगे याच्याविरुद्ध फसवणुकीचा गुन्हा दाखल करून तपास सुरू केला आहे. सध्या रतन लांडगे तालुका जालना पोलिसांच्या ताब्यात आहे. पोलीस या प्रकरणाचा सखोल तपास करत असून, रतन लांडगे याच्या साथीदाराचाही शोध घेतला जात आहे.

हे ही वाचा >> कोकण, रायगड रत्नागिरीसह पुणे आणि साताऱ्यात पावसाचं थैमान, 'या' भागांना येलो अलर्ट

रतन लांडगे याच्यावर यापूर्वीही जादू-टोण्याच्या नावाखाली फसवणूक केल्याचा आरोप आहे. 18 जून रोजी तालुका जालना पोलिसांनी त्याला एक लाख रुपये एक कोटींमध्ये बदलण्याचे खोटे आश्वासन देऊन फसवणूक केल्याप्रकरणी अटक केली होती. आता या नव्या प्रकरणाने त्याच्या गुन्हेगारी कारवायांचा पर्दाफाश झाला आहे.

सावधान...

दरम्यान, या घटनेमुळे जालना परिसरात खळबळ उडाली आहे. पोलिसांनी नागरिकांना अशा खोट्या आश्वासनांना बळी न पडण्याचे आणि जादू-टोना, पैशाचा पाऊस किंवा पैसे दुप्पट करण्याच्या आमिषांना भुलू नये, असा सावधानतेचा इशारा दिला आहे. कोणत्याही अनोळखी व्यक्तीवर विश्वास ठेवण्यापूर्वी त्याची खातरजमा करावी, असेही पोलिसांनी आवाहन केले आहे.