'दिल्ली Bomb Blast'शी 'या' 4 डॉक्टरांचं कनेक्शन! दहशतवादी संघटनांशी संबंध, घातक रसायने अन् विस्फोटके...

मिळालेल्या माहितीनुसार, स्फोट होण्यापूर्वी सोमवारी सकाळी जम्मू-काश्मीर आणि फरीदाबाद पोलिसांनी जॉइंट ऑपरेशनमध्ये दोन घरांमधून 2,900 किलो आयईडी बनवणारी रसायने, शस्त्रे आणि दारूगोळा जप्त केल्याचं सांगितलं जात आहे. ही कारवाई जैश-ए-मोहम्मद (जेईएम) आणि अन्सार गजवत-उल-हिंद (एजीयूएच) यांच्याशी जोडलेल्या आंतरराज्यीय दहशतवादी नेटवर्कचा पर्दाफाश करताना करण्यात आली. ही जप्ती आणि दिल्ली बॉम्बस्फोट यांच्यातील वेळ पाहता एजन्सींमध्ये वेगळाच संशय निर्माण होत आहे. 

तसेच, या हल्ल्यात काही डॉक्टरांचंही कनेक्शन समोर येत आहे. म्हणजेच, या स्फोटाशी संबंधित कोणताही पुरावा हा पेशाने डॉक्टर असलेल्या व्यक्तीशी संबंधित आहे.

डॉ. आदिल अहमदच्या लॉकरमध्ये AK-47

या भीषण स्फोटापूर्वी जम्मू आणि काश्मीर पोलिसांनी आधी अनंतनाग येथे डॉ. आदिल अहमद राठरला अटक केली. तो अनंतनाग मेडिकल कॉलेजमध्ये डॉक्टर असून पोलिसांनी त्याच्या लॉकरमधून AK-47 रायफल जप्त केली. या डॉक्टरचे जैश-ए-मोहम्मद आणि अंसार गजवत-उल-हिंदशी संबंध असल्याचं आढळून आलं. 

'कॅरम कॉक' नावाची असॉल्ट रायफल 

7 नोव्हेंबर रोजी हरियाणाच्या फरीदाबाद येथून एका महिलेला अटक करण्यात आली. लखनऊमधील अल-फलाह यूनिव्हर्सिटीमध्ये कार्यरत असलेल्या शाहीन शाहिद या महिला डॉक्टरच्या कारमध्ये 'कॅरम कॉक' नावाची असॉल्ट रायफल सापडली. या संपूर्ण नेटवर्कमध्ये तिच्या भूमिकेचा पोलीस अद्याप तपास करत असून तिची ओळख आणि फोटो जाहीर करण्यात आलेला नाही.

हे ही वाचा: Delhi car blast प्रकरणातील आरोपीचा कारमधील फोटो समोर, कोण आहे डॉ. मोहम्मद उमर?

'रिसिन' नावाचे अत्यंत घातक विष

त्याच दिवशी म्हणजेच 7 नोव्हेंबर रोजी गुजरात एटीएसने अहमद मोहियुद्दीन सैय्यद नावाच्या एका डॉक्टरला ताब्यात घेण्यात आलं. हा डॉक्टर हैदराबाद येथील रहिवासी असून त्याने चीनमधून शिक्षण पूर्ण केलं आहे. हा डॉक्टर एरंडेच्या बियांपासून बनवलेले 'रिसिन' नावाचे अत्यंत घातक विष तयार करत असल्याचं तपासात समोर आलं होतं. त्याने दिल्लीतील आझादपूर मंडी, अहमदाबादमधील नरोडा फळ बाजार आणि लखनऊमधील आरएसएस कार्यालय यासारख्या गर्दीच्या ठिकाणांची अनेक महिने रेकी (ऊर्जा उपचार) केली होती.

हे ही वाचा: नातेवाईकाला स्टेशनवर सोडायला गेला अन् क्षणात होत्याचं नव्हतं झालं, दिल्ली कार स्फोटात बिहारच्या पंकजचा दुर्दैवी मृत्यू!

डॉ. मुझमिल शकीलजवळ तब्बल 2900 किलो विस्फोटक 

या ऑपरेशनमध्ये 10 नोव्हेंबर रोजी फरीदाबाद येथून चौथ्या डॉक्टरला अटक करण्यात आली होती. डॉ. मुझमिल शकील असं त्या डॉक्टरचं नाव असून तो अल-फलाह यूनिव्हर्सिटीमध्ये शिकवत होता. त्याच्याकडे बॉम्ब बनवण्यासाठी वापरात येणारे 360 किलो अमोनियम नाइट्रेट सापडल्याची माहिती आहे. तसेच, त्याच्या दुसऱ्या ठिकाणाहून 2563 किलो विस्फोटक जप्त करण्यात आले. जैश सारख्या प्रतिबंधित संघटनांशी शकीलचा संबंध असून यापूर्वी त्याचा श्रीनगरमध्ये दहशतवादी पोस्टक लावण्यात समावेश असल्याचं समोर आलं होतं. अनंतनागमध्ये अटक झालेल्या अदील अहमद राठर डॉक्टराकडून मिळालेल्या माहितीनंतर शकीलची ओळख समोर आली. 

या डॉक्टरांचा केवळ दहशतवादी संघटनांशी संबंध नसून ते स्वत: शस्त्रे आणि घातक रसायने बनवत असल्याची माहिती मिळाली होती.