Sharad Pawar: बारामतीत 'श्रमलेला' बाप 'लढणाऱ्या' लेकीसाठी कसं करतायत जीवाचं रान?

Sharad Pawar Baramati: बारामती: 'श्रमलेल्या बापासाठी लेक नारळाचं पाणी, लढणाऱ्या लेकीसाठी माझा बाप माझी बुलंद कहाणी...' अजित पवारांनी बंड केलं... राष्ट्रवादी फुटली... तेव्हा सुप्रिया सुळेंनी या ओळी म्हणत फुटीर गटाविरोधात हुंकार भरला... त्यातल्याच 'लढणाऱ्या लेकीसाठी माझा बाप बुलंद कहाणी...' या ओळीचा प्रत्यय सध्या बारामती लोकसभा मतदारसंघात दिसतोय. पुतण्यानेच दंड थोपटल्यानं शरद पवार आपल्या लेकीसाठी जीवाचं रान करताना दिसत आहे. शरद पवार सुप्रिया सुळेंसाठी बारामतीत कशी मेहनत घेतायत? पवार लेकीसाठी कशी फिल्डींग लावतायत? हेच सविस्तर जाणून घेऊया. (how the father sharad pawar is working hard for his daughter supriya sule in baramati see what is the real politics in baramati)

मुलीसाठी स्वत: पवार उतरले रिंगणात...

याआधीच्या निवडणुका पाहिल्या तर अजित पवारांसह पवार कुटुंबातले इतर मंडळी प्रचार करत होते. शरद पवार अगदी शेवटच्या प्रचार सभेला यायचे. पण,  जशी राष्ट्रवादीत फूट पडली आणि लोकसभा निवडणूक जवळ आली तसे पवार बारामतीत अधिक सक्रीय झालेले दिसतात. कारण, अजित पवारांनी राष्ट्रवादी पक्ष ताब्यात घेतल्यानंतर बारामती लोकसभा मतदारसंघातली लढत अंत्यत महत्वाची आहे. इथून सुप्रिया सुळेंविरोधात अजित पवारांच्या पत्नी सुनेत्रा पवार लोकसभेच्या मैदानात उतरल्या आहेत. 

अजित पवारांच्या राष्ट्रवादीचे प्रदेशाध्यक्ष सुनील तटकरे यांनी एकप्रकारे सुनेत्रा पवारांची उमेदवारी घोषित केलीय...सुनेत्रा पवार बारामतीत लोकसभा मतदारसंघात दौरे करतानाही दिसतात. त्यांचा प्रचारही सुरू झाला. सुप्रिया सुळेंसोबतच अजित पवारांचाही बारामतीवर होल्ड आहे. त्यामुळे सुप्रिया सुळेंसाठी सुनेत्रा पवारांचं मोठं आव्हान असणार आहे. शरद पवारांनी सुप्रिया सुळेंची उमेदवारीही जाहीर केलीय. पण पवार फक्त उमेदवारी जाहीर करून थांबले नाहीत. ते बारामती लोकसभा मतदारसंघात लहान लहान सभा आणि मेळावे घेत आहेत. 

कार्यकर्ते, शेतकरी, वकील, डॉक्टर, व्यापारी अशा सगळ्या समूहाचे मेळावे घेऊन पवार त्यांच्यासोबत संवाद साधताना दिसत आहेत. वेगवेगळ्या समाजाचे मेळावे घेऊन पवार लेकीसाठी मोट बांधताना दिसतात. पवार फक्त मेळावे आणि छोट्या-मोठ्या सभा घेऊनच थांबले नाहीतर ते कट्टर विरोधकांच्या, दुसऱ्या पक्षातील नेत्यांच्या भेटीगाठी घेत आहेत. यात पहिलं नाव येतं ते म्हणजे 25 वर्षांपासूनचे कट्टर विरोधक अनंतराव थोपटेंची घेतलेली भेट...

हे ही वाचा>> BJP 2nd list : ठाकरेंची सोडली साथ, खासदाराने BJPसोबत साधला भलताच डाव

शरद पवारांचा भोरमध्ये शेतकरी मेळावा होता. त्याआधी पवारांनी अनंतराव थोपटेंची त्यांची घरी जाऊन भेट घेतली. अनंतराव थोपटे आणि शरद पवार यांच्यामध्ये संघर्ष होता. पण, 1999 ला हा संघर्ष अधिक तीव्र झाला. कारण, 1999 ला अनंतराव थोपटे मुख्यमंत्रीपदाच्या शर्यतीत होते. त्यांच्यासाठी भोरमध्ये सोनिया गांधींनी सभाही घेतली होती. पण, शरद पवारांच्या राष्ट्रवादीनं भोरमध्ये दिलेल्या उमेदवारानं थोपटेंचा पराभव केला. तेव्हापासून थोपटे आणि पवारांमधला संघर्ष अधिक तीव्र होता. पण, आता लोकसभा निवडणुकीच्या तोंडावर पवारांनी अनंतराव थोपटेंची भेट घेतली...भोर विधानसभा मतदारसंघातून थोपटेंची ताकद सुप्रिया सुळेंना मिळावी यासाठी पवारांनी ही भेट घेतल्याचं बोललं जातंय...

फक्त विरोधकच नाहीतर पवार जुन्या सहकाऱ्यांच्या भेटीगाठी घेताना दिसतायत...काही दिवसांपूर्वी गोंविदबागेत राज्य साखर संघाचे माजी अध्यक्ष पृथ्वीराज जाचक आणि शरद पवारांमध्ये चर्चा झाली होती. पृथ्वीराज जाचक यांनी 2003 पर्यंत पवारांसोबत काम केलं होतं. पण, छत्रपती सहकारी साखर कारखान्यामुळे जाचक हे पवारांपासून वेगळे झाले होते. याच पृथ्वीराज जाचक यांचं इंदापूर तालुक्यात चांगलं नेटवर्क आहे. इंदापूर विधानसभा मतदारसंघातून सुप्रिया सुळेंना मदत व्हावी म्हणून पवार या भेटीगाठी घेत असल्याची चर्चा आहे. 

यात तिसरी भेट म्हणजे, चंद्रकांत तावरेंची...त्यांनी शरद पवारांसोबत 40 वर्ष काम केलं...तावरेंनीच पवारांच्या पहिल्या निवडणुकीचा प्रचार केला होता. पण 1997 साली त्यांच्यात वाद झाले आणि तावरे पवारांची साथ सोडून भाजपात गेले...अजित पवारांनी शरद पवारांची साथ सोडताच हेच चंद्रकांत तावरे सुप्रिया सुळेंसोबत काटेवाडीत एकाच व्यासपीठावर दिसले....यानंतर मनसेचे प्रदेश उपाध्यक्ष सुधीर पाटसकर असतील किंवा जनता दलाचे माजी आमदार दादा जाधवराव असतील यांच्यासोबत पवारांची चर्चा झाली. दादा जाधवराव यांचं पुरंदरमध्ये चांगलं नेटवर्क आहे. त्यांच्या माध्यमातून पवार सुप्रिया सुळेंसाठी गणितं जुळवत असल्याची चर्चा आहे...

इतकंच नाहीतर अजित पवारांच्या कट्टर विरोधकांना शरद पवार जवळ करताना दिसतायत...ज्या हर्षवर्धन पाटलांनी अजित पवारांना कंटाळून काँग्रेसला रामराम ठोकला होता तेच हर्षवर्धन पाटील आणि शरद पवार चर्चा करताना दिसलेय. मंगळवेढ्यातील एका कार्यक्रमात शरद पवार आणि हर्षवर्धन पाटील एकत्र चर्चा करताना दिसले होते. तेव्हाच पवार अजितदादांच्या विरोधात काहीतरी डाव आखणार अशी चर्चा सुरू झाली होती.

हे ही वाचा>> महाराष्ट्रात BJP चा सेफ गेम! बड्या नेत्यांना उमेदवारी देऊन कसा साधणार डाव?

अजित पवारांच्या विरोधकांमध्ये दुसरं नाव येतं ते म्हणजे विजय शिवतारेंचं...विजय शिवतारेंनी बारामती लोकसभा मतदारसंघातून निवडणूक लढवण्याची घोषणा केली. यावर पवारांनी दिलेली प्रतिक्रिया खूप काही सांगून जाते... विजय शिवतारेंनी मागच्या निवडणुकीत चांगली मतं घेतली होती. आता त्यांनी निवडणूक लढवण्याचा निर्णय घेतलाय. आता त्याचे परिणाम कोणावर होतील हे बघू? त्यांचे मतदार हे महाविकास आघाडीचे नाहीत, असं पवार म्हणाले. पवारांनी हे वक्तव्य केलं आणि याचा फटका हा महायुतीच्या उमेदवार सुनेत्रा पवारांना बसेल हे पवारांनी अप्रत्यक्षपणे सूचवलं...

जुने सहकारी, कट्टर विरोधक आणि अजित पवारांचे विरोधक, मेळावे, छोट्या मोठ्या सभा यामधून पवार बारामती लोकसभा मतदारसंघात लेकीसाठी कसं जीवाचं रान करतायत हे दिसतंय...पण, बारामतीची जनता कोणाला पाठिंबा देतेय? शरद पवार की अजित पवार? हे लोकसभा निवडणुकीनंतरच कळेलं.