रावसाहेब दानवेंना मोठा झटका, भोकरदनच्या नगरपालिकेत पराभव, राष्ट्रवादीच्या कार्यकर्त्यांचा दानवेंच्या घरासमोर जल्लोष

भोकरदन नगर परिषद निवडणूक ही केवळ स्थानिक स्वराज्य संस्थेची निवडणूक न राहता, ती प्रतिष्ठेची आणि राजकीय ताकद मोजणारी लढत बनली होती. भाजपने या निवडणुकीत पूर्ण ताकद लावली होती. रावसाहेब दानवे यांचा भोकरदन हा बालेकिल्ला मानला जातो. त्यामुळे येथील नगराध्यक्ष पद भाजपसाठी अत्यंत महत्त्वाचे होते. मात्र, मतदारांनी भाजपला नाकारत राष्ट्रवादी काँग्रेस शरद पवार गटाच्या उमेदवाराला स्पष्ट कौल दिला.

हेही वाचा : नितेश राणेंना मोठा झटका, कणकवली अन् मालवण नगरपालिकेत पराभव; निलेश राणेंनी मैदान मारलं

निवडणूक निकाल जाहीर होताच भोकरदनमध्ये राजकीय वातावरण तापले. राष्ट्रवादी काँग्रेस शरद पवार गटाच्या कार्यकर्त्यांमध्ये उत्साहाचे वातावरण पाहायला मिळाले. विशेष म्हणजे, भाजप नेते रावसाहेब दानवे यांच्या भोकरदन येथील निवासस्थानासमोर राष्ट्रवादीच्या कार्यकर्त्यांनी एकत्र येत जोरदार जल्लोष केला. यावेळी घोषणाबाजी करत राष्ट्रवादीच्या कार्यकर्त्यांनी विजयाचा आनंद व्यक्त केला.

या निवडणुकीत स्थानिक प्रश्न, विकासकामांचा आढावा, तसेच सत्ताधाऱ्यांविरोधातील नाराजीचा मोठा प्रभाव दिसून आला. राष्ट्रवादी काँग्रेस शरद पवार गटाने प्रचारादरम्यान स्थानिकांचे प्रश्न मांडले. याचा थेट फायदा मिर्झा समरिन यांना झाल्याचे बोलले जात आहे. या पराभवामुळे भाजपसाठी आगामी स्थानिक स्वराज्य संस्थांच्या निवडणुकांपूर्वी चिंतेची घंटा मानली जात आहे. विशेषतः दानवे पिता-पुत्रांसाठी हा पराभव राजकीयदृष्ट्या मोठा धक्का मानला जात आहे. दुसरीकडे, राष्ट्रवादी काँग्रेस शरद पवार गटासाठी हा विजय आत्मविश्वास वाढवणारा ठरला आहे. मराठवाड्यात आपली ताकद वाढत असल्याचा संदेश या निकालातून गेला आहे.

इतर महत्त्वाच्या बातम्या 

रामराजे नाईक निंबाळकरांना तगडा झटका, नगराध्यक्षपदाच्या निवडणुकीत मुलाचा पराभव; फलटणमध्ये काय घडलं?