'हाण की बडीव' सभागृहात आदित्य ठाकरे, भास्कर जाधव भडकले, संपूर्ण ड्रामा

राज्यमंत्री आशिष जयस्वाल यांचे उत्तर 

यावेळी सरकारच्या बाजूने उत्तर देताना संबंधित खात्याचे राज्यमंत्री आशिष जयस्वाल यांनी आपण सरकारच्या वतीने उत्तर देणार असल्याचे स्पष्ट केले. मदत व पुनर्वसन खात्याचे मंत्री घटनास्थळी असून सरकारच्या वतीने उत्तर देण्याची जबाबदारी आपण पार पाडत असल्याचे त्यांनी सांगितले. कोणत्या मंत्र्यांनी उत्तर द्यावे, असा आग्रह विरोधकांनी धरू नये, असेही आशिष जयस्वाल म्हणाले.. मात्र भास्कर जाधव यांनी त्यावर समाधान व्यक्त केले नाही. महाराष्ट्रावर एवढे मोठे संकट आले असताना सरकार बेजबाबदार, निर्दयी आणि बहुमताच्या जोरावर वागत असल्याचा आरोप त्यांनी केला. अशा परिस्थितीत केवळ भाषणे करून विषय संपवला जात असल्याची टीकाही त्यांनी सभागृहात केली.

आमदार अतुल भातखळकर मध्येच बोलण्यासाठी उभे राहिले 

दरम्यान, भाजपचे आमदार अतुल भातखळकर हे मध्येच बोलण्यासाठी उभे राहिल्यानंतर वातावरण आणखी तापले. त्यांनी भास्कर जाधव यांच्यावर टीका करत, ज्यांना विरोधी पक्षनेते होण्याची आस लागली आहे त्यांनाच मदत व पुनर्वसन मंत्री कोण आहेत हे माहिती नसल्याचा टोला लगावला. सरकार संवेदनशीलपणे उत्तर देत असताना सरकारला बेताल म्हणणे योग्य नसल्याचेही त्यांनी म्हटले. त्यानंतर सभागृहात दोन्ही बाजूंनी जोरदार शाब्दिक चकमक झाली. अध्यक्षांनी वारंवार हस्तक्षेप करून सदस्यांना शांत राहण्याचे आणि मूळ विषयावर बोलण्याचे आवाहन केले.

अतुल भातखळकर यांच्या वक्तव्यानंतर शिवसेना (ठाकरे गट) आमदार आदित्य ठाकरे यांनीही आक्रमक भूमिका घेत त्यांना प्रत्युत्तर दिले. त्यानंतर भास्कर जाधव यांनीही भातखळकर यांच्यावर जोरदार टीका करत त्यांच्या बोलण्याच्या शैलीवर आक्षेप घेतला. प्रत्येक वेळी अहंकारी पद्धतीने वागण्याचा आरोप करत, तुम्हाला बोलण्याचा अधिकार कोणी दिला, असा सवाल त्यांनी केला. तसेच राज ठाकरे यांच्या मुलाखतीचा उल्लेख करत भातखळकर यांच्यावरही टीका केली. अध्यक्षांनी वारंवार हस्तक्षेप करून चर्चा मूळ विषयावर आणण्याचा प्रयत्न केला. अखेरीस भास्कर जाधव यांनी संपूर्ण महाराष्ट्राचे लक्ष या चर्चेकडे लागले असून सभागृहातून जनतेला दिलासा देणारे उत्तर मिळणे अपेक्षित असल्याचे सांगत आपले म्हणणे पुढे सुरू ठेवले.