ठाकरेंची साथ सोडल्यानंतर ओमराजेंची पहिली प्रतिक्रिया, पक्षांतराची कारणे सांगितली!

हेही वाचा : फॉर्च्युनरमध्ये कोंडून भाजप नेत्यासह तिघांना जिवंत जाळलं, धक्कादायक कारण समोर

'मी सध्या मोठ्या धर्मसंकटात सापडलोय'

शिंदेसेनेत प्रवेश करण्याच्या चालू असलेल्या चर्चांवर बोलताना ओमराजे निंबाळकर यांनी सांगितले की, ते सध्या एका मोठ्या धर्मसंकटात सापडले आहेत. शिंदेसेनेतील प्रवेशाबाबत त्यांच्यावर कार्यकर्त्यांचा प्रचंड दबाव आहे. पक्षांतराच्या मागे मोठ्या प्रमाणावर आर्थिक व्यवहार किंवा कोट्यावधी रुपये घेतल्याची चर्चा सुरू आहे, परंतु ही चर्चा संपूर्णपणे खोटी, तथ्यहीन आणि बिनबुडाची आहे. राजकारणात आपल्यासाठी सत्ता आणि पैसा नेहमीच गौण राहिले असून, आपण पैशांसाठी हा निर्णय घेत नसून केवळ मतदारसंघातील रखडलेली विकासकामे पूर्ण करण्यासाठीच हा पाऊल उचलत आहोत. जर आपल्याला पैशांसाठीच राजकारणात रस असता, तर खूप पूर्वीच पक्षप्रवेश केला असता, असे सांगत त्यांनी 50कोटी आणि 'वाय प्लस' सुरक्षेच्या चर्चा पूर्णपणे फेटाळून लावल्या. आपण एक सामान्य खासदार म्हणून प्रत्येकाचा फोन स्वतः उचलतो आणि लोकांमधेच वावरतो, त्यामुळे आपल्याला कोणत्याही विशेष सुरक्षेची गरज नाही, असेही त्यांनी ठामपणे नमूद केले.

हेही वाचा : Personal Finance: रिडेव्हलपमेंटमध्ये ‘हे’ असतात घरमालकांचे हक्क, अजिबात घेऊ नका माघार..

'कार्यकर्त्यांना बळ आणि ताकद देणे गरजेचे होते'

महायुतीचे नेते आणि उद्धवसेनेचे नेतृत्व यांच्या कार्यपद्धतीतील मोठा आणि स्पष्ट फरक ओमराजे यांनी या मुलाखतीदरम्यान घट्टपणे मांडला. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे एवढ्या मोठ्या संख्येने आमदार निवडून आलेले असतानाही ते शांत बसलेले नाहीत. स्थानिक स्वराज्य संस्थांच्या निवडणुकीत त्यांनी अहोरात्र मेहनत घेतली आणि आता विधान परिषदेच्या निवडणुकीतही ते स्वतः मैदानात उतरून फिरत आहेत. या उलट, पक्षप्रमुख उद्धव ठाकरे यांच्या प्रकृती अस्वास्थ्यामुळे त्यांना फिरणे शक्य नाही हे समजू शकते, परंतु किमान युवा नेते आदित्य ठाकरे यांनी तरी संपूर्ण राज्यभर फिरून कार्यकर्त्यांना बळ आणि ताकद देणे गरजेचे होते, परंतु दुर्दैवाने तसे झाले नाही, अशी खंत त्यांनी व्यक्त केली. पक्षनेतृत्वाकडून कार्यकर्त्यांना योग्य ती ताकद न मिळाल्यामुळे पक्षात कमालीची नाराजी असल्याचे त्यांच्या बोलण्यातून स्पष्ट झाले.

ठाकरे गटात राहून भविष्यात येणाऱ्या अडचणींबद्दल बोलताना त्यांनी आपल्या राजकीय अस्तित्वाबद्दल चिंता व्यक्त केली. खासदार म्हणून आपण लोकांची कामे करण्यासाठी प्रचंड कष्ट आणि प्रयत्न करतो, तरीही नगर परिषद, पंचायत समिती किंवा जिल्हा परिषदेच्या निवडणुकांमध्ये आपली सत्ता का येत नाही, हा यक्षप्रश्न निर्माण होतो. आज जर मतदारसंघात हीच बिकट परिस्थिती राहिली, तर भविष्यात आपल्या स्वतःच्या राजकीय अस्तित्वालाच मोठा धोका निर्माण होईल, अशा वेळी लोकप्रतिनिधी म्हणून हताश बसण्याशिवाय काय करावे, असा प्रश्न त्यांनी केला. मतदारसंघात लोकांना शेतरस्ते आणि पूल हवे आहेत, गावांमध्ये रोहित्र (डीपी) बसवण्यासाठी स्वतः तीन-तीन वेळा प्रस्ताव देऊनही कामे मंजूर होत नाहीत. आपल्याकडे ना निधी असतो, ना कामे करून घेता येतात, यामुळे मतदारसंघाच्या विकासासाठी आणि राजकीय अस्तित्वासाठी पक्ष सोडण्याशिवाय दुसरा पर्याय शिल्लक राहिला नसल्याचे त्यांनी शेवटी सांगितले.