भक्तांचे ‘प्रतिपोलादी पुरुष’ म्हणत अमित शाहांवर शिवसेना (UBT) ची बोचरी टीका

मुंबई: जम्मू-काश्मीरमधील पूँछमध्ये नुकत्याच झालेल्या दहशतवादी हल्ल्यात 5 जवान शहीद झाले. ज्यानंतर शिवसेना (UBT) पक्षाचं मुखपत्र असलेल्या सामनाच्या अग्रलेखातून मोदी सरकारवर जोरदार टीका करण्यात आली आहे. एवढंच नव्हे तर यावेळी देशाचे गृहमंत्री आणि भाजपचे ज्येष्ठ नेते अमित शाह यांच्यावर टीकेची झोड उठविण्यात आली आहे. ‘देशाचे गृहमंत्री व भक्तांचे ‘प्रतिपोलादी पुरुष’ अमित शहा हे कामाच्या ओझ्याखाली दडपून गेले आहेत.’ अशा शेलक्या शब्दात अमित शाह यांच्यावर बोचरी टीका करण्यात आली आहे. (shiv sena ubt criticizes amit shah in saamana editorial on jammu kashmir terrorist attack)

‘2016 मध्ये देशात नोटाबंदी लादली तेव्हा काळय़ा पैशाबरोबर दहशतवाद संपविण्याचेही कारण देण्यात आले होते. मात्र कश्मीरमधील दहशतवादी हल्ले सुरूच आहेत. गृहमंत्री, संरक्षणमंत्री व पंतप्रधान राजकीय कामात व्यस्त आहेत त्याचाच फायदा घेऊन पाकड्या अतिरेक्यांनी लष्कराच्या वाहनांवर बॉम्ब फेकले. ज्यात जवान शहीद झाले.’ असं म्हणत शिवसेनेने मोदी-शाहांवर टीका केली आहे.