होम
राजकीय आखाडा
गुन्ह्यांची दुनिया
शहर-खबरबात
राशीभविष्य-धर्म
पैशाची बात
फोटो बाल्कनी
हवामानाचा अंदाज
टॉपिक
Suresh Kalmadi Passed away : काँग्रेसचे ज्येष्ठ नेते आणि माजी केंद्रीय मंत्री सुरेश कलमाडी यांचे आज (6 जानेवारी) पहाटे पुण्यातील त्यांच्या निवासस्थानी निधन झाले. ते 81 वर्षांचे होते. त्यांच्या निधनाने पुण्याच्या राजकारणातील एक प्रभावी पर्व संपुष्टात आले आहे. कलमाडी यांचे पार्थिव दुपारी दोन वाजेपर्यंत पुण्यातील त्यांच्या निवासस्थानी अंत्यदर्शनासाठी ठेवण्यात येणार असून, त्यानंतर त्यांच्यावर अंत्यसंस्कार केले जाणार आहेत. "कधी काळी पुणे म्हणजे कलमाडी आणि कलमाडी म्हणजे पुणे", असं म्हणावं, इतका त्यांचा पुण्यातील राजकारणात दबदबा होता.
ADVERTISEMENT
पुण्याच्या राजकारणात दबदबा, सलग 10 वर्ष होते खासदार
केंद्रात काँग्रेसची सत्ता असताना सुरेश कलमाडी यांनी केंद्रीय मंत्रिपद भूषवले होते. पुण्याच्या राजकारणात त्यांचा दीर्घकाळ दबदबा राहिला. पक्षाच्या चौकटीबाहेरही त्यांना मानणारा मोठा वर्ग होता. याच जनाधाराच्या जोरावर कलमाडी सलग 3 वेळा पुणे लोकसभा मतदारसंघातून खासदार म्हणून निवडून आले. एकेकाळी पुण्याच्या राजकारणावर त्यांची पकड मजबूत होती आणि स्थानिक राजकारणातील ते एक प्रभावी नेतृत्व मानले जात होते.
मात्र राष्ट्रकुल क्रीडा स्पर्धांतील घोटाळ्याच्या आरोपांमुळे सुरेश कलमाडी यांच्या राजकीय कारकिर्दीला मोठा धक्का बसला. 2010 मध्ये झालेल्या दिल्ली राष्ट्रकुल क्रीडा स्पर्धांच्या आयोजनात भ्रष्टाचार आणि आर्थिक गैरव्यवहाराचे गंभीर आरोप त्यांच्यावर झाले होते. आयोजन समितीचे अध्यक्ष म्हणून काम करत असताना झालेल्या कथित गैरव्यवहारांमुळे त्यांना अटकही करण्यात आली होती. या प्रकरणामुळे त्यांची राजकीय वाटचाल उतरणीला लागली.
दीर्घ काळ चाललेल्या कायदेशीर प्रक्रियेनंतर एप्रिल 2025 मध्ये अंमलबजावणी संचालनालयाने (ED) सादर केलेल्या क्लोजर रिपोर्टनंतर त्यांना या प्रकरणात दिलासा मिळाला होता. मात्र, या निर्णयानंतरही कलमाडी पुण्याच्या राजकारणात पुन्हा सक्रिय भूमिका घेऊ शकले नाहीत. गेल्या काही वर्षांपासून ते आजारपणामुळे सार्वजनिक आणि राजकीय जीवनापासून दूर होते. काही दिवसांपूर्वी त्यांची प्रकृती खालावल्यानंतर राष्ट्रवादी काँग्रेसचे ज्येष्ठ नेते शरद पवार यांनी त्यांची भेट घेतली होती.
सुरेश शामराव कलमाडी यांचा जन्म 1 मे 1944 रोजी झाला. ते भारतीय राष्ट्रीय काँग्रेसचे महत्त्वाचे नेते होते. सुरेश कलमाडी यांनी 2004 आणि 2009 च्या लोकसभा निवडणुकीत विजय मिळवला होता. सलग दहा वर्ष ते पुण्याचे खासदार म्हणून काम पाहात होते. त्यांनी भारतीय ऑलिंपिक असोसिएशनचे अध्यक्षपद भूषवले होते, तसेच 2010 च्या दिल्ली राष्ट्रकुल क्रीडा स्पर्धांच्या आयोजन समितीचे अध्यक्ष म्हणूनही ते कार्यरत होते. राजकारणात येण्यापूर्वी कलमाडी भारतीय वायुसेनेत वैमानिक म्हणूनही कार्यरत होते. त्यांच्या निधनाने पुणेच नव्हे, तर राष्ट्रीय राजकारण आणि क्रीडा क्षेत्रातील एक वादग्रस्त पण प्रभावी व्यक्तिमत्त्व काळाच्या पडद्याआड गेले आहे.
इतर महत्त्वाच्या बातम्या
ADVERTISEMENT
