कर्नाटकचा पुढचा मुख्यमंत्री कोण? ‘हा’ नवा चेहरा की जुन्याला लागणार लॉटरी!

who will be next chief minister of karnataka : राजकारणात रस असणाऱ्या सगळ्यांना प्रतिक्षा आहे ती कर्नाटक विधानसभा निवडणुकीची. कारण सत्ता कुणाची येणार, याबरोबरच मुख्यमंत्री कोण होणार, याकडे सगळ्यांचं लक्ष आहे. आतापर्यंत मुख्यमंत्री कोण होऊ शकेल, याबद्दल कोणतीही कल्पना आलेली नाही. असं असलं, तरी काही नावं मुख्यमंत्रीपदाच्या शर्यतीत आहेत. त्यामुळे कर्नाटकचं नेतृत्व नव्या चेहऱ्याच्या हाती जाणार की, जुन्याचीच लॉटरी लागणार, अशी चर्चा सुरू आहे.

कर्नाटकात कोण आहेत मुख्यमंत्री पदाच्या शर्यतीत, कुणाचं पारडं किती जड… बघूयात

सिद्धरामय्या : लोकसभा निवडणुकीच्या पार्श्वभूमीवर ठरू शकतात मोठा डाव

माजी मुख्यमंत्री सिद्धरामय्या है मैसूर जिल्ह्यातील सिद्धरमनहुंडी येथील आहेत. 2013 ते 2018 या काळात ते कर्नाटकाचे मुख्यमंत्री होते. जर कर्नाटकात काँग्रेसला 113 जागा मिळाल्या तर सिद्धरामय्या यांच्या नावाला पक्षाची पहिली पसंती असू शकते.

2018 मध्ये झालेल्या निवडणुकीत सिद्धरामय्या मुख्यमंत्री होते आणि त्यांच्या नेतृत्वाखालीच काँग्रेसने निवडणूक लढवली. त्यावेळी काँग्रेसच्या जागा कमी झाल्या. 122 वरून काँग्रेस 88 वर आली. असं असलं तरी राहुल गांधींची अशी भूमिका आहे की, 2024 च्या लोकसभा निवडणुका डोळ्यासमोर ठेवल्यास पंतप्रधानांना आव्हान देण्यासाठी कर्नाटक महत्त्वाचं राज्य आहे आणि त्यामुळे सिद्धरामय्या मोठा डाव ठरू शकतात. पण, त्यांना लिंगायत आणि वोक्कालिगा समुदायातून विरोध असल्याचं दिसून आलेलं आहे.

डीके शिवकुमार : काँग्रेसचे निष्ठावंत आणि संकटमोचक

शिवकुमार यांची इच्छा आहे की, मुख्यमंत्री होण्यासाठी ही सगळ्यात चांगली संधी आहे. डीके शिवकुमार हे आठ वेळा कनकपुरा मतदारसंघातून आमदार राहिलेले आहेत आणि सिद्धरामय्याशिवाय त्यांनी या मतदारसंघात आपलं वर्चस्व निर्माण केलेलं आहे. काँग्रेसचा निष्ठावंत आणि संकटमोचक अशी त्यांची ओळख आहे. अनेक राज्यातील निवडणुकीनंतर काँग्रेसच्या आमदारांना एकत्र ठेवण्याची जबाबदारीही त्यांनी निभावली आहे.

हेही वाचा >> “आ गए गद्दार”, शरद पवार शिंदेंवर बरसले, मोदींवरही चढवला हल्ला!

देशातील सर्वात श्रीमंत राजकीय नेत्यांपैकी डीके शिवकुमार हे  एक आहेत. इतर राज्यातील निवडणुका आणि लोकसभा निवडणुकीसाठी निधी संकलन करण्याची जबाबदारी देण्याबद्दल शिवकुमार हे विश्वासू नेते असल्याची भावना दिल्लीतील काँग्रेस पक्षश्रेष्ठींची आहे.

डीके शिवकुमार यांच्या कुमकुवत गोष्टी सांगायच्या म्हणजे त्यांची सीबीआय, ईडी आणि आयकरकडून चौकशी सुरू आहे. ते 104 दिवस तुरूंगातही राहिलेले आहेत.

बसवराज बोम्मई : जेडीयूमधून भाजपत अन् मुख्यमंत्री

बसवराज बोम्मई हे मुख्यमंत्रीपदासाठी भाजपतील महत्त्वाचा चेहरा आहेत. बोम्मई भाजप आणि राष्ट्रीय स्वयंसेवक संघासाठी बाहेरचे असले आहे. 2006 मध्ये बीएस येडियुरप्पामुळे ते जेडीयूमधून भाजपत आले. त्यानंतर जुलै 2021 मध्ये येडियुरप्पांना हटवून भाजपने त्यांना मुख्यमंत्रीपदी बसवले.

बोम्मई मुख्यमंत्री असतानाच्या काळात अनेक मुद्दे उफाळून आले. त्यांना मुख्यमंत्री म्हणून स्वतःची छाप पाडता आली नाही. कट्टर धार्मिक गटांना नियंत्रित करण्यात अपयशी ठरले. हिजाब, हलाल आणि अजान या मुद्द्यांवरून वाद आणि बिघडलेली कायदा सुव्यवस्था. त्यामुळे अनुभवी नेत्याला मुख्यमंत्री करण्याची मागणीही भाजपतून होऊ शकते.

प्रल्हाद जोशी : नरेंद्र मोदी आणि अमित शाहांचा विश्वासू माणूस

हुबळी धारवाड मतदारसंघातून 4 वेळा खासदार राहिलेल्या प्रल्हाद जोशी यांचं नावही मुख्यमंत्रीपदासाठी चर्चेत आहे. 2019 मध्ये मोदींच्या मंत्रिमंडळात स्थान मिळाल्यानंतर त्यांचं वजन वाढलं. नरेंद्र मोदी आणि अमित शाह यांच्या जवळ जाऊन त्यांनी या दोन्ही नेत्यांचा विश्वास संपादित केला. येडियुरप्पांना बाजूला केल्यापासूनच प्रल्हाद जोशी यांच्या नावाची चर्चा सातत्याने होत राहिली आहे. जोशी समर्थकांना अशी आशा आहे की निकालानंतर भाजप राज्यात बदल करेल.

हेही वाचा >> पत्रकार परिषद शरद पवारांची, पण चर्चा सोनिया दुहानांची, त्या कोण आहेत?

नकारात्मक बाबी म्हणजे लोकसभा निवडणूक आता केवळ वर्षभराच्या अंतरावर असून, लिंगायत सुमदायातील व्यक्तीला मुख्यमंत्री न करणं भाजपला अवजड ठरू शकतं. कारण कर्नाटकात लिंगायत समुदाय मोठा आहे. निवडणुकीच्या तोंडावर जगदीश शेट्टार आणि लक्ष्मण सावदी हे भाजप सोडून काँग्रेसमध्ये गेले. त्यामुळे भाजपला मुख्यमंत्रीपदाचा उमेदवार ठरवताना विचार करावा लागणार आहे.

एचडी कुमारस्वामी : लॉटरी लागणार का?

मतदारांनी दिलेला कौल आणि नशीब जोरावर राहिल्यानं एचडी कुमारस्वामी यांना दोन वेळा मुख्यमंत्रीपद मिळालं. जर भाजप आणि काँग्रेसला 113 जागा मिळाल्या तर कुमारस्वामी पुन्हा किंगमेकर ठरू शकतात. त्यामुळे त्यांना मुख्यमंत्रीपदाची लॉटरी लागू शकते. हे सगळं जेडीएसला किती जागा मिळणार यावरही अवलंबून आहे. जर कुमारस्वामींच्या पक्षाला 30-35 जागा मिळाल्या तर मुख्यमंत्रीपदाची मागणीही केली जाऊ शकते.

यापूर्वी 2019 मध्ये कुमारस्वामी काँग्रेससोबत सत्तेत राहिलेले आहेत. हे सरकार चालवण्याचे प्रयत्न मात्र कमी पडले आणि केवळ 14 महिन्यात कुमारस्वामींच्या नेतृत्वाखालील सरकार कोसळलं होतं. प्रशासकीय पातळीवरही त्यांची छाप पडू शकली नव्हती.